சவூதியிலிருந்து ஹாஜி ஸாருக்கு அதிரை ஜாஃபர் எழுதும் கடிதம் !

மறக்க முடியவில்லை ஹாஜி சார்...!!

அரிது அரிது மனிதனாகப் பிறத்தல் அரிது, அவ்வாறு பிறந்தாலும் கல்வியில் சிறந்து விளங்குதல் அதைவிட அரிது
                       
கற்கத் தகுந்த நுல்களைக் குற்றமின்றி கற்று, அக்கல்வியை தன்னலமின்றி பிறருக்கு கற்றுக் கொடுப்பதே ஆசிரியர்களின் குறிக்கோள். உலகில் மக்கள் செய்யும் தொழில்கள் பல காணப்பட்டாலும், ஆசிரியர் தொழிலே சிறந்தது. இதற்கு இணையான தொழில் வேறொன்றில்லை. மக்களின் அறியாமையை நீக்குவதால்தான் ஆசிரியப்பணியே அறப்பணி, அதற்கே தன்னை அர்ப்பணி ,தியாகப்பணி,  சமூகப் பணி என்று  எல்லோராலும் சிறப்பிக்கப்படுகிறது. ஒவ்வொரு ஆசிரியரும் ‘என் கடன் பணி செய்து கிடப்பதே’ என்ற கருத்தை மனதில் கொண்டு பணியாற்றுகின்றனர்.

அந்த வகையில் அதிரை மற்றும் அதை சுற்றி உள்ள ஊர் மாணவர்களுக்கு கல்வி வழங்கிய மேதைகளில் ஹாஜி முஹம்மது சாருக்கு மிக முக்கிய இடம் உண்டு. தனக்காக வாழாமல் மாணவர்களுக்காக வாழும் தன்னலமற்ற ஆசிரியர்களில் ஹாஜி சாரின் பணி மகத்தானது.

இவரிடம் கல்வி பயின்ற மாணவர்களின் தவறுகளை சுட்டிக்காட்டினால் தலைநிமிர்ந்து பார்க்கவும் முடியாமல் வெட்கத்தால் நாணி நிற்கும் மாணவர்களைக்  கண்டு மனம் நெகிழ்ந்து அவர்களை வெற்றிப் பாதையில் செலுத்தும் சிறந்த ஆசிரியராக வலம் வந்தவர் ஹாஜி சார். இன்றளவும் மாணவர்கள் மனதில் அழியாமல் நிற்கும் சிகரம் இந்த ஹாஜி சார். இவரின் சேவை  உண்மையிலேயே தாய்க்கும், பிள்ளைக்குமான உன்னதமான நிமைமை அன்று.

சிறந்த அர்ப்பணிப்பு உணர்வு, எந்த சுயநல நோக்கமும் இல்லாமை, பாடப்புத்தக அறிவு மட்டுமின்றி, பல்துறை பரந்த அறிவை மாணவர்களுக்கு வழங்கி, அவர்களின் உலகை விரியச் செய்து, உத்திரவாதமான எதிர்காலத்தை உறுவாக்கியவர் இவர்

மற்றவர்கள் தவறு என்று விமரிசித்தாலும், தனது சுய சிந்தனை மீது அசைக்க முடியாத நம்பிக்கை வைத்தவர்.  கும்பலோடு கும்பலாய்க் கரைந்து போய்விடாமல் எந்தச் சூழ்நிலையிலும் தனது சொந்த நம்பிக்கையின்படி சுயமாகச் செயல்படும் தைரியமிக்கவர் ஹாஜி சார்.

கற்கை நன்றே, கற்கை நன்றே
                பிச்சைப் புகினும் கற்கை நன்றே

என்பதற்கேற்க கல்வியை பிறரிடம் இரந்தாவது கற்க வேண்டும். அத்தகைய கல்வியைப்  புகட்டும் ஆசிரியப் பணிக்கு சிறந்ததொரு நிலையை நிறுத்தி காதிர் முகைதீன் மேல் நிலைப் பள்ளியிலிருந்து விடை பெற்றாலும்...

எங்கள் மனதை விட்டு விடை பெறாத ஆசிரியப் பெருமகன் ஹாஜி முஹம்மது அவர்கள் நோயற்று நீடூடி வாழ வேண்டும் என்று  வல்ல அல்லாஹ்விடம் பிரார்த்திக்கிறேன்

என்றும் பிரியத்துடன் உங்கள் முன்னாள் மாணவன்

ஜஃபருல்லாஹ் 
(கா.மு மேல் நிலைப் பள்ளி 1990 வரை)