குடிநீர் வழங்காததை கண்டித்து ஷிஃபா மருத்துவமனை அருகே திடீர் சாலை மறியல் !

அதிரை பேரூராட்சியின் 20 வது வார்டு உட்பட்ட பகுதிகளில் கடந்த நான்கு நாட்களாக குடிநீர் வழங்கப்படாததை கண்டித்து ஷிஃபா மருத்துவமனையின் பின்புறமாக வசிக்கும் காலனிவாசிகள் இன்று இரவு 8.30 மணியளவில் திடீரென சாலை மறியலில் ஈடுபட்டனர்.

சுமார் 50க்கும் மேற்பட்ட அப்பகுதியினர் காலி குடங்களுடன் சாலையில் அமர்ந்து ஆர்பாட்டத்தில் ஈடுபட்டனர். தகவலறிந்த போலீசார் சம்பவ இடத்திற்கு விரைந்து வந்து சமரசத்தில் ஈடுபட்டனர். குடிநீர் உடனே வழங்க ஏற்பாடு செய்யப்படும் என போராட்டகாரர்களிடம் சம்பந்தப்பட்டவர்கள் உறுதியளித்ததை அடுத்து அனைவரும் கலைந்து சென்றனர். இதனால் பட்டுக்கோட்டை சாலையில் போக்குவரத்து சிறிது நேரம் பாதிப்படைந்தது.

நேற்று இரவும்  - இன்று மதியமும் ட்ரான்ஸ்பார்மரில் திடீரென ஏற்பட்ட பழுத்தால் அதிரையில் தொடர் மின்தடங்கள் ஏற்பட்டது. இதனால் அதிரையில் உள்ள சில இடங்களுக்கு குடிநீர் வழங்குவதில் சிரமம் ஏற்பட்டுள்ளதாக தெரிகிறது.