என்னமோ நடக்குதுங்க! என்னான்டு கேட்டா அடிக்க வருதுங்க!!

நமதூர் ஒரு பாரம்பரியமிக்க ஊர் என்றால் அது மிகையாகாதுங்க, வந்தவர்களை வாழவைத்துக் கொண்டிருக்கும் ஊர் நமது அதிரைங்க, இங்கு எல்லா மக்களும் அண்ணன் தம்பிகளாக சகோரத்துவம் ஓங்கி இருக்கின்ற ஊருங்க.

மார்க்க வல்லுனர்கள், கவிஞர்கள், படித்தவர்கள், அறிவுடையோர், நல்ல சிந்தனையுடையோர், செல்வமுடையோர், பொதுநல போக்குடையோர், சமூக ஆர்வலர்கள், எந்த பிரதி பலனும் எதிர்ப்பார்க்காமல் சமூக சேவை செய்பவர்கள், ஆசிரியப் பெருமக்கள், கல்விக்கூடங்கள், மருத்துவ மனைகள், திருமண கூடங்கள், இன்னும் எத்தனையோ அம்சம்சங்களை பெற்ற ஊருங்க.

பொழுது போகவில்லை என்று அலையத் தேவை இல்லைங்க, மற்ற ஊருகளைப் போல் இல்லாமல் இந்த அதிரை அந்த அளவுக்கு உன்னதமான சுகந்தமான ஒரு அம்சமான ஊருங்க.

கட்டுமான பணிகளை எடுத்துகொண்டால் அதுவும் அதிகம்க, கட்டுமானத்திற்கு தேவையான பொருட்களின் விலைகளும் அதிகம்க, கட்டுமான கூலியைப் பார்த்தால் அது மிக மிக அதிகம்க, வேலை செய்கின்றவருக்கு ஒரு கூலிங்க, அவரை கூட்டி வருகிறவருக்கு வேறு ஒரு கூலிங்க, செய்கின்ற வேலைகளெல்லாம் அவ்வளவு தரம் என்று சொல்ல முடியாதுங்க, முன்பெல்லாம் டீ வடை எல்லாம் அவங்கலோடங்க, இப்போ நம்மலோடங்க, இனிவரும் காலங்களில் டீக்கு பதில் நாட்டு முட்டைதானுங்க, வடைக்கு பதில் ஹல்வாங்க.

கடைத்தெருவுகளில் உணவுக்காக கடல் சார்ந்த உணவோ, பறவை இன உணவோ, கால்நடை உணவோ, மரம் செடி கொடிகளில் காய்க்கின்ற உணவோ, நீரை சூடேற்றி பருகுகின்ற பானமோ எல்லாமே அதிகம்க, விலைகளும் வானத் தொடும் அளவுங்க.

கரையூர்தெருவில் உள்ள மீன் மார்கெட்டுக்கு நம் பெண்கள் கூட்டு கூட்டாக சேர்ந்து ஆட்டோ பிடித்து போய் மீன் மற்றும் காய்கறி வாங்கி வருகிறாங்கங்க. ஒரு ஆட்டோ சவாரிக்கு அங்கு போய்திரும்பி வர கட்டணம் 100ரூபாய். ஒரு நாளைக்கு சராசரியாக முப்பது-நாற்பது ஆட்டோ சவாரி. கட்டணத்தை கணக்கு பாருங்க. 3000-4000ரூபாய்தானுங்க. நம் ஊருக்கு மத்தியில் பெண்களுக்கென்று ஒரு மார்கெட் திறந்து இருந்தால் எவ்வளவு மிச்சம். பணம் ஒரு பக்கம் மிச்சமாக இருந்தாலும் அவதி, வேதனை, இல்லாமல் இருக்குமுங்க, நேரமும் மிச்சமுங்க.

இங்கு வீட்டு மனைகளெல்லாம் தீப்பெட்டி அளவுதானுங்க, விலையை கேட்டா அது ஒரு கன்டைனர் அளவுங்க இது ரொம்பவே அதிகம்க, மீன்களும் ஒன்னும் சரி இல்லைங்க, விலையைக் கேட்ட அதுவும் அதைவிட அதிகம்க, இருந்தாலும் விற்றுப் போய்டுதுங்க, அது என்ன தங்கமான்னு கேட்ட பல்லை இறுக்கிக்கொண்டு ஒரு முறை முறைக்குதுங்க.    

ஆண்களும் சரி, பெண்களும் சரி காசுகளை சிலவு செய்வதில் இளம்வயது ஆண்களும் பெண்களும் மிக மிக அதிகம்க, சிலவு செய்வதில் சரிக்கு சரி சமம்ங்க, சிக்கனம் என்பது மிக மிக குறைவுங்க, இதற்கெல்லாம் காரணம் யாரென்று பார்த்தால் கண்டு கொள்ளாத ஒரு சில தகப்பன்மார்களும் கணவர்மார்களுமுங்க.

வாகன போக்குரத்தும் மிக மிக அதிகம்க, அதன் கட்டணங்களும் போகின்ற வேகங்களும் அதைவிட அதிகம்க.

இரண்டு சக்கர வாகனம் கடனுக்கு கிடைக்குது என்று அதை வாங்கி கண்ணா பின்னா என்று ஓட்டி பல விபத்துக்கு ஆளாகி மிகுந்த துயரம். அவசியம் ஏற்பட்டால் வாகனம் ஓட்டியே ஆகணும் அதில் தவறேதும் இல்லைங்க, இருந்தாலும் இவ்வளவு கவனக்குரைவோடு இந்த வேகம் தேவையா? வாகனம் ஓட்ட வயது வரம்பு என்று ஏதும் இல்லையா? என்னங்க இது?

எந்த ஊரிலும் இல்லாத அளவுக்கு நமதூரில் விளம்பர வண்டிகள், பழ வண்டிகள், தெருவுக்கு தெரு அதிகம்க, அதன் ஒலி எழுப்புதலும் காது குருத்தெல்லாம் தெறிக்கின்ற அளவுக்கு இருக்குதுங்க, வாங்கித் தின்ன ஆள் இருக்குதுங்க, என்னான்டு கேட்க ஆள் இல்லைங்க.  

நமதூர் பெற வேண்டிய அனேக அரசு சார்ந்த சலுகைகள் தடைபட்டு கிடக்குதுங்க, அதெல்லாம் கிடைக்குமா? அல்லது கிடைக்காமல் போய்விடுமா? நீள அகல உயர  இரயில் பாதை அமைத்து இரயில் வண்டிகள் எப்போது ஓடப்போகுதுங்க? இன்னும் எவ்வளவோ காரியங்கள் நடக்கப்போகுது என்று சொல்றாங்க, ஆனால் நடக்களைங்க.

ஆதார் அட்டை, பாஸ்போர்ட், ஓட்டர் ஐடி, ரேசன் கார்டு, டிரைவிங் லைசென்ஸ், வீட்டு வரி, வாட்டர் பில், எலெக்ட்ரிக் பில், டெலிபோன் பில், மொபைல் போன் பில், வங்கி பாஸ்புக், இன்ஸ்யூரன்ஸ், வீட்டு பத்திரம், வீட்டு பட்டா, பிறந்த சான்றிதழ், படித்த சான்றிதழ், கேபிள் இணைப்பு பில், ஒரே கடையில் வாடிக்கையாக வாங்கும் மளிகை சாமான்கள் பில், காய்கறி பில், இறைச்சி மீன் இறால் பில், மருத்துவ பில், இவை எல்லாம் பக்காவாக ஒரே பெயரில் இருக்குதுங்க, இருந்தாலும் நம்புவதற்கு அரசு அதிகாரிகள் யோசிக்கின்றாங்கங்க. இந்தப் பிரச்னையை போக்க எல்லாத்தையும் ஒருங்கிணைத்து ஒரே அட்டையாக கொடுத்தால் எவ்வளவு வசதிங்க. யாருங்க யோசிப்பது? சொல்லுங்க.

நமதூரில் உள்ள அனைத்து வங்கிகளும் நல்லபடியாக சம்பாதிக்குதுங்க, ஆனால் இன்றுவரை எந்த வங்கியாவது ஒரு மரத்தையாவது நட்டுருக்குதாங்க?

இங்கு நடக்கின்ற சங்கதிகளை இப்படி ஒவ்வொன்றாக பட்டியல் போட்டு பார்த்தால் எல்லாமே அதிகம். இருந்தாலும், எதுவும் தடை இல்லாமல் நிறைவேறிவிடுகின்றதுங்க.

நமதூரில் எல்லாமே அதிகம்க ஆனால் ஒற்றுமை இல்லைங்க. ஒற்றுமை இல்லாததினால் விழிப்புணர்வு அறவே இல்லைங்க.

என்னங்க இது? நாமெல்லாம் எப்போதுங்க ஒற்றுமையாக விழிப்புணர்வோட செயல்படப் போறோம்முங்க? விருந்து சோறுன்ன ஒற்றுமையை பாருங்க, உலகமே அசந்துவிடுமும்க.

இன்ஷா அல்லாஹ், என்று நாம் எல்லோரும் சொல்றோமுங்க, சொல்லிப்புட்டு முயற்சி இல்லைங்க.

நாம் ஒற்றுமையுடன் செயல்பட்டால் முடியாதது ஏதும் உண்டோ? எல்லாவற்றையையும் ஒரு கட்டுக்குள் கொண்டுவரணும் என்றால் ஒற்றுமை வேண்டும், ஒற்றுமையோடு செயல்பட இருக்கின்ற பெலன் போதாதா? இருக்கின்ற பெலத்தோடு செயல்படுவோம்.

வீட்டுக்கு ஒரு மரம் வளர்ப்போம். அதுபோல் குடும்பம் செழிக்க குடும்ப ஒற்றுமை வேண்டும், குடும்ப ஒற்றுமை வேண்டும் என்றால் இளையவர்கள் பெரியவர்களுக்கு கீழ்படிந்து மதித்து நடக்க வேண்டும்.

பெரியவர்கள் இளையவர்களுக்கு அறிவுரை ஆலோசனை சொல்வது நல்லதுக்குதானே அன்றி தீயதுக்கு அல்ல.

என்னமோ நடக்குதுங்க, நமக்கு ஒண்ணுமே புரியலைங்க, என்னான்டு கேட்டா அடிக்க வருதுங்க, 20-25வருடங்களுக்கு முன்னாடி இப்படி இல்லைங்க, எல்லாமே இப்பதானுங்க.

இப்படிக்கு.

K.M.A. ஜமால் முஹம்மது.

Consumer & Human Rights.

த/பெ. மர்ஹூம். கோ.மு. முஹம்மது அலியார்.

உரிமையாளர், அதிரை 13வாடி, வண்டிப்பேட்டை.