ஆடு முட்டியதில் செய்னாங் குளம் இரும்பு கேட் சாய்ந்தது [ படங்கள் இணைப்பு ]

அதிரை பேரூராட்சியின் சார்பாக 2012-2013 ஆம் ஆண்டுக்கான நபார்டு நிதி உதவி திட்டத்தின் கீழ் கீழத்தெரு மஹல்லாக்கு உட்பட்ட புதுக்குடி பகுதியில் அமைந்துள்ள செய்னாங் குளத்திற்கு தடுப்பு சுவர் அமைத்தல் மற்றும் மேம்படுத்துதல் ஆகிய பணிகளுக்காக ரூபாய் 50 லட்சம் நிதி ஒதுக்கீடு செய்யப்பட்டது. குளத்தின் பெரும்பாலான பணிகள் நிறைவுற்ற நிலையில் தேர்தல் முடிவுகள் அறிவிக்கப்பட்ட பிறகு திறப்புவிழா காணப்படவுள்ளது.

தண்ணீர் இல்லாமல் காட்சியளிக்கும் செய்னா குளத்தின் கரையை சுற்றி இரும்பு கம்பியால் முள் வேலி அமைத்து ஆடு மாடுகள் உள்ளே புகாதாவாறு தடுக்கப்பட்டிருந்தது. மேலும் குளக்கரையின் இருபுறங்களிலும் இரும்பு கேட் வைக்கப்பட்டிருந்தன.

நேற்று மாலை குளத்தின் உள்ளே செல்வதற்காக அப்பகுதியில் மேய்ந்துகொண்டிருந்த ஆடுகள் மூடியிருந்த இரும்பு கேட்டை தலையால் முட்டி திறப்பதற்கு முயற்சிக்கும்போது திடிரென கீழே சாய்ந்து விழுந்தது.

இதுகுறித்து அப்பகுதியில் வசிக்கும் மரைக்கான் நம்மிடம் கூறுகையில்...
'நேற்று மாலை எனது வீட்டின் மாடியில் இருக்கும் போது எதார்ச்சையாக கீழே எனது கவனம் சென்றது. அப்போது அங்கு மேய்ந்துகொண்டிருந்த ஆடுகள் கூட்டம் கேட்டை திறக்க முயற்சித்துகொண்டிருந்தன. திடிரென சத்தத்துடன் கேட் கீழே சாய்ந்து விழுந்தது. அதிர்ச்சியடைந்த ஆடுகள் கூட்டம் அங்கிருந்து அலறியடித்து நாலாபுறமும் ஓடின. அருகில் நின்று இதை பார்த்தவர்களுக்கு பெரும் அதிர்ச்சியையும் ஏற்படுத்தியது. தரமற்ற தூண்களை கொண்டு மெல்லிய இரும்பு கேட் அமைக்கப்பட்டிருந்ததால் இந்த விபத்து நிகழ்ந்துள்ளது. நல்ல வேலை அப்பகுதியில் விளையாடிக்கொண்டிருக்கும் சிறுவர்கள் மீது விழாமல் இருந்தது' என்றார் ஆச்சரியத்துடன்.