அதிரையில் கட்டி முடித்து 5 ஆண்டுகளுக்கு பிறகு திறப்பு விழா காணப்பட உள்ள சுகாதார வளாகம் !

அதிரை தேர்வு நிலை பேரூராட்சிக்கு உட்பட்ட பகுதி மேலத்தெரு. இந்த பகுதியில் திறந்த வெளியில் மலம் கழிப்பதை முழுமையாக தவிர்க்கும் பொருட்டு நபார்டு திட்டத்தின் கீழ் 2008-2009 ஆம் ஆண்டிற்கான நிதி ரூபாய் 6 லட்சம் ஒதுக்கீட்டில் பெண்கள் பயன்படுத்தும் வகையில் நவீன வசதியில் சுகாதார வளாகம் கட்டி முடிக்கப்பட்டது.

இந்த வளாகம் கட்டி முடிக்கப்பட்டு பல ஆண்டுகள் ஆகியும் திறக்கப்படாமல் இருந்ததால் பாழடைந்து காணப்பட்டது. விரைவாக திறக்க வலியுறுத்தி பல்வேறு தரப்பினரும் தொடர் கோரிக்கை வைத்த வண்ணம் இருந்தனர்.

தற்போது அதிரை பேரூராட்சி நிர்வாகம் சுகாதார வளாகத்தை திறப்பதற்கு உரிய முயற்சியில் முழு வீச்சில் ஈடுபட்டுள்ளது. இதற்காக இன்று காலையில் அதிரடியாக துப்புரவு ஊழியர்கள் மூலம் வளாகத்தை சுத்தம் படுத்தும் பணியில் தீவிரமாக ஈடுபடுத்தி வருகிறது.

இதுகுறித்து துப்புரவு தொழிலாளர்கள் நம்மிடம் கூறியதாவது...

'சுகாதார வளாகம் நீண்ட காலமாக திறக்கப்படாமல் பராமரிப்பின்றி இருந்து வந்தது. இதனால் அசுத்தங்கள் அதிகமாக் காணப்பட்டன. இன்று காலை முதல் அசுத்தங்கள் அனைத்தையும் அப்புறப்படுத்தி வருகின்றோம்' என்றனர்.