தண்ணீருக்காக கண்ணீர் விடும் அதிரை தேசம் !

ஒருகாலத்தில் பெரும்பாலானோர், கிணற்று நீரையே குடிநீராக பயன்படுத்தி வந்தனர். நாளடைவில் நீர் ஊற்று அற்றுப்போனதால் போர்வெல் அமைக்கும் நிலைக்கு சாதாரண மக்களும் தள்ளப்பட்டனர். அப்படியே போர்வெல் போட்டாலும், தற்போது 250 அடிவரை போர்வெல் அமைத்தால் மட்டுமே தண்ணீர் கிடைக்கும். ( இப்போது அதற்கும் ஆபத்து ) இதனால், மிகப்பெரிய தண்ணீர் பஞ்சத்தை நோக்கி அதிரையும் அதைச் சுற்றியுள்ள பகுதிகளும் தள்ளப்பட்டுள்ளன.

நூறு ஆண்டுகளுக்கு முன்பும் வறட்சி ஏற்பட்டது. அப்போதெல்லாம் தண்ணீரின் தேவை குறைவாக இருந்தது. இப்போது நிலைமையே வேறு. மக்கள்தொகை பெருக்கம், தொழில் வளர்ச்சியால் தண்ணீரின் தேவை அதிகரித்துள்ளது. ஆனால் ஆண்டுக்கு ஆண்டு, உலகுக்கு கிடைக்கும் நல்ல நீரின் அளவு குறைகிறது. மூன்றாம் உலகப் போர் என்று ஒன்று வருமானால் அது தண்ணீருக்காகதான் என விஞ்ஞானிகள் எச்சரிக்கின்றனர். குடிநீர், சுகாதாரம், விவசாயம், கால்நடைகளுக்கு என பல வழிகளில் தண்ணீரின் தேவை அதிகரித்துக் கொண்டே போகிறது.

தண்ணீர் சிக்கலின் கோரமுகம் இனியும் சகித்துக்கொள்ள முடியாத நிலையை அடைந்துவிட்டது. நகரங்களில் மட்டுமே விலை கொடுத்து  வாங்கிய தண்ணீர் ( கேன் தண்ணீர் ) நிலை மாறி அதிரையிலும் தண்ணீர் வியாபாரம் கொடி கட்டிப் பறக்கிறது.  தண்ணீரை, பணம் கொடுத்து வாங்குவது சாதாரண மக்களைப் பொறுத்தவரை ஆடம்பரச் செலவே ! இந்தத் தண்ணீர் பஞ்சம், சாதாரண மக்களை அவலத்திலும் அவலமாகத் தாக்குகிறது. ஆனால், அவர்களால் இதை எதிர்த்து எதுவுமே செய்ய முடியவில்லை.

தொழில் முறையில் நகரங்களில் மட்டுமே இருந்து வந்த தண்ணீர் சுத்திகரிப்பு வியாபாரம் அதிரை போன்ற சிறு ஊர்களுக்கும் வந்துவிட்டதால் நிலத்தடி நீர் ஆதாரத்தை இரக்கமின்றி இடைவிடாமல் உறிஞ்சுகிறோம். போதாக்குறைக்கு கழிவுகள், அனைத்தையும் முறையாகச் சுத்திகரிக்காமல் நீர்நிலைகளிலும் நிலத்துக்குள்ளும் விடுகிறோம். இவ்வளவு கொடுமைகளையும் செய்துவிட்டு, பூமிக்குள் இருந்து இடைவிடாமல் பாலும் தேனும் வர வேண்டும் என்று எதிர்பார்த்தால் எப்படி?

அதுமட்டுமா ? அதிரையில் போர்வெல்களின் எண்ணிக்கைத் தாறுமாறாக அதிகரித்துவிட்டன. சமீப காலங்களில் அதிரையின் போர்வெல்களின் எண்ணிக்கையைக் கணக்கிட்டால் அது நம்மை மலைக்க வைக்கும்.

"தண்ணீர் பிரச்சனையால்தான் தெருவை மாற்றினேன்" என்று சிலர் கூறுகின்றனர். ஆனால், தண்ணீர் பிரச்னை எங்கும் நீக்கமற நிறைந்திருப்பதால் எங்கு ஓடினாலும் இந்தப் பிரச்னையில் இருந்து நமதூர் மக்களால் தப்பிக்க முடிவதில்லை.

'விதைநெல்லை விற்றுத் தின்றவனின் இரவு விடியாது’ என்பார்கள். இன்று நம்மைச் சூழ்ந்துள்ள கரிய இருள் அதுதான். சிலர், மழை பெய்தால் இந்த நிலை சரியாகிவிடும் என்று நினைக்கின்றனர். சரியானாலும்கூட அது மிக மிகத் தற்காலிகமானதே. ஏனெனில், மழைநீரைச் சேமிக்கும் நீர் ஆதாரங்கள் அழிக்கப்பட்டுவிட்ட நிலையில், பெய்யும் மழைநீரை எதில் சேமித்து வைப்பது ? பெய்யும் மழைநீரில் 16 சதவிகித நீராவது நிலத்துக்குள் செல்ல வேண்டும். அப்போதுதான் நிலத்தடி நீர் சரியான மட்டத்தில் பராமரிக்கப்படும்.

தங்கத்தை விட தண்ணீரின் விலை மதிப்பு அதிகரித்தாலும் ஆச்சரியப் பட எதுவுமில்லை அதுவும் ஒருநாள் வரலாம் அந்த 'ஒருநாள்’ நூற்றாண்டுகளுக்குப் பின் வரப்போவது இல்லை. நம் காலத்திலேயே மிக விரைவில் வந்துவிடலாம். அந்தச் சமயத்தில் தண்ணீர் மேலும் விலைமதிப்பற்ற செல்வமாக மாறும்.

ஒட்டுமொத்த அதிரையும் தாகத்தால் தவித்துக்கொண்டிருக்கும் நிலையில், இது தனிநபர்களின் முயற்சியால் மட்டும் தீர்க்கக்கூடிய சிக்கல் அல்ல. அரசாங்கம் முழு வீச்சில் இறங்கிச் செயலாற்ற வேண்டும். ஏரி, குளங்களைச் சீரமைத்து, ஆக்கிரமிப்புகளை அகற்றி, அவற்றுக்கு நீர் கொண்டுவந்து சேர்க்கும் வாய்க்கால்கள், ஓடைகளைச் சீர் செய்வதில்தான் நமது தற்போதைய சிக்கலுக்கான நிரந்தரத் தீர்வு இருக்கிறது.

குளங்களையும் ஏரிகளையும் முறையாக சீரமைக்காமல் விட்டோம். அதுமட்டுமல்லாமல் குளங்களுக்கு நீர் கொண்டு வருவதில் முயற்சி செய்வதாகக் கூறி அதில் வீண் அரசியல் செய்து இறுதியில் எந்த குளத்திற்கும் தண்ணீர் இல்லாமல் வறண்ட பூமியாக்கிய பெருமையும் நமதூர் பிரமுகர்களையே சேரும்.

வரலாற்று நோக்கில் ஏரிப்பாசனம்தான் தமிழ்நாட்டின் முக்கியமான நீர் ஆதாரம். ஏனெனில், 73 சதவிகிதம் பாறைப்பரப்பைக் கொண்ட தமிழ்நாட்டில், ஆண்டு முழுவதும் மழை பெய்வது இல்லை. ஆகவே, பெய்யும் மழையைச் சேமித்து வைத்தாக வேண்டிய கட்டாயம், தமிழர்களுக்குப் புவியியல் ரீதியாகவே இருக்கிறது. இதனால் 2,000 ஆண்டுகளுக்கு முன்பே ஏரிகளை உருவாக்கி ஏரிப் பாசன முறையில் உலகுக்கே வழிகாட்டியாகத் திகழ்ந்தனர்.

இப்போதுகூட அரசு கறாராக நடவடிக்கை எடுக்குமானால் தற்காலிகத் தீர்வுகளில் தொடர்ந்து கவனம் செலுத்தும் அரசு, நிரந்தரத் தீர்வை நோக்கிய முதல் அடியை இப்போதேனும் எடுத்து வைக்க வேண்டும்.

இனியாவது இதையெல்லாம் உணர்ந்து இனியும் தாமதிக்காமல் அரசும், சமூக அமைப்புகள், கட்சிகள் சமூக ஆர்வலர்கள் என பாகுபாடின்றி, ஒற்றுமையுடன் துரிதமாக செயல்பட்டு அதிரையின் நீர்வலத்தை காக்க முயற்சி மேற்கொள்ள வில்லையெனில், அதிரை மற்றும், அதைச் சுற்றியுள்ள மக்கள், தண்ணீருக்காக கண்ணீர் விடும் நாள் வெகு தூரத்தில் இல்லை.

தற்போது மேட்டூர் அணை திறக்கப்பட்டு இருக்கிறது. இன்னும் நாலைந்து தினங்களில் கடைமடைப் பகுதிகளுக்குத் தண்ணீர் வந்து சேர வாய்ப்பு இருக்கிறது. அந்தத் தண்ணீர் முறையாகப் பங்கீடு செய்யபட்டால் நமது ஊரில் இருக்கும் நீர் நிலைகள் நிரம்ப வாய்ப்புண்டு. சி எம் பி வாய்க்காலுக்குத் தண்ணீர் வரும் வழிகளின் தடைகளை சீர் செய்து முதலில் ஊரின் எல்லைக்குத் தண்ணீரை வரவழைத்துப் பின் காட்டுக் குளம் தொடங்கி கடைசியாக இருக்கும் வெட்டிக் குளம் வரை ஒவ்வொன்றாக நிரப்ப அந்தந்த தெரு முஹல்லாவில் வசிக்கும் இளைஞர்கள் ஒன்று கூடி இரண்டு மூன்று நாட்கள் இணைந்து பணியாற்றினால் இந்தப் பிரச்னை தீர வாய்ப்புண்டு. இப்போது மேட்டூரிலிருந்து வெளியேற்றப் படும் நீரின் அளவு அதிகரிக்கப்படுமென்று தெரிகிறது. கையில் உள்ள வெண்ணையை விட்டுவிட்டு பிறகு நெய்க்கு அலைய வேண்டாமென்று வேண்டிக் கொள்ளலாம்.

இதற்காக அரசை எதிர்பார்க்காமல் தெருவினர்கள்தான் கைகளில் கடப்பாரை மண்வெட்டிகளுடன் கைலிகளை மடித்துக் கட்டிக் கொண்டு களத்தில் இறங்க வேண்டும்.