கடல்போல் காட்சியளிக்கும் செக்கடி குளத்தில் உற்சாக குளியல் !

அதிரை பேரூராட்சியின் சார்பில் அதிரை அருகே உள்ள நசுவினி ஆற்றின் ஓடையிலிருந்து பம்பிங் மூலம் நீர் இறைத்து ஆலடிக்குளத்திற்கு கொண்டு வரப்பட்டது. ஆலடிக்குளம் நிரம்பியதை அடுத்து சிஎம்பி வாய்க்கால் இணைப்பில் உள்ள செக்கடி குளத்திற்கு கடந்த சில தினங்களாக தண்ணீர் வந்தது.

இந்த நிலையில் தொடர்ந்து வந்தடைந்த பம்பிங் நீரால் செக்கடி குளத்தின் நீர் மட்டம் உயர்ந்து தற்போது கடல் போல் காட்சியளிக்கிறது.

இதையடுத்து இன்று காலை இந்த பகுதியை சேர்ந்தவர்கள் உற்சாகமாக குளித்து மகிழ்கின்றனர். குளத்தில் டைவ் அடித்து, நடுப்பகுதி வரை நீந்தியும் செல்கின்றனர். குளத்தில் காணப்படும் பச்சை நிற பாசிகளை அப்புறப்படுத்தி வருகின்றனர்.

காலை நேரத்தில் செக்கடி குளம் நடை மேடையில் வாக்கிங் செல்வோர் குளத்தில் குளிப்பதைக் கண்டு மகிழ்ச்சியுடன் பார்வையிடுகின்றனர்.
செக்கடி குளத்தில் குளித்து மகிழ இந்த பகுதியினர் தொடர்ந்து ஆர்வம் காட்டுவதால் தினமும் காலை 7.30 மணி முதல் பகல் 12 மணி வரை செக்கடி பள்ளி குளத்திற்கு செல்லும் வாசல் பகுதியை திறந்து வைக்க ஏற்பாடு செய்யப்பட்டுள்ளது.

செக்கடி குளத்தை சுற்றி நடை மேடை பூங்கா அமைத்த பிறகு முதல் முறையாக தண்ணீர் வந்தடைந்து குளம் முழுவதும் நிரம்பியுள்ளது. இந்த நிலையில் முதல் குளியலை அதிரை பேரூராட்சி தலைவர் எஸ்.ஹெச் அஸ்லம் இன்று காலை தொடங்கி வைத்தார். இவரோடு இவரது நண்பர்களும் உற்சாகமாக குளித்தனர்.