அதிரை அரசு மருத்துவமனையில் இரவு நேர மருத்துவர் இன்று முதல் நியமனம் !

அதிரை அரசு மருத்துவமனையில் இரவு நேர மருத்துவர் உடனடியாக நியமிக்க வலியுறுத்தி அதிரை பேரூராட்சி தலைவர் எஸ்.ஹெச் அஸ்லம் தலைமையில் கூடிய ஊர் பொதுமக்கள், மருத்துவமனை அருகே கடந்த [ 16-05-2015 ] உண்ணாவிரத போராட்டம் நடத்தினர்.

இதையடுத்து தஞ்சை மாவட்ட சுகாதார நலப்பணிகள் இணை இயக்குனர் டாக்டர். மீனாட்சி, பட்டுக்கோட்டை வாட்டாசியர் சேதுராமன், மருத்துவர் எட்வின் ஆகியோர் உண்ணாவிரத பந்தலுக்கு நேரடியாக வந்து பேச்சுவார்த்தை நடத்தினர். இதில் அரசின் சார்பில் கூடுதல் மருத்துவர் நியமனம் செய்யப்பட்டதாக உறுதியளித்ததை தொடர்ந்து உண்ணாவிரத போராட்டம் கைவிடப்பட்டது.

இந்நிலையில் இன்று இரவு முதல் மருத்துவர் இராமசாமி மருத்துவ பணியை தொடர இருக்கிறார்.  முதல் நாளான இன்று அதிரை பேரூராட்சி தலைவர் எஸ்ஹெச் அஸ்லம் மருத்துவரை நேரடியாக சந்தித்து தனது வாழ்த்துகளை தெரிவித்துக்கொண்டார். அப்போது ஜஹபர் அலி, அப்துல் ஹலீம், கமால் உசேன், முத்துசாமி, இஷாக், சைபுதீன் ஆகியோர் உடனிருந்தனர்.

இதுதொடர்பாக அதிரை பேரூராட்சி தலைவர் எஸ் ஹெச் அஸ்லம் நம்மிடம் கூறியதாவது:
'எங்களின் நியாமான கோரிக்கையை ஏற்று அதிரை அரசு மருத்துவமனையில் உடனடியாக இரவு நேர மருத்துவ சேவை ஆற்ற மருத்துவர் ஒருவரை பணியமர்த்திய மாவட்ட சுகாதார நலப்பணிகள் இணை இயக்குனர் டாக்டர். மீனாட்சி, பட்டுக்கோட்டை வட்டாசியர் சேதுராமன், மருத்துவர் எட்வின் ஆகியோருக்கு எங்களின் நெஞ்சார்ந்த நன்றி. மேலும் கோரிக்கை வெற்றி பெற ஒத்துழைப்பு வழங்கிய அனைத்து ஜமாத் நிர்வாகிகள், கிராம பஞ்சாயத்தார்கள், சமூக ஆர்வலர்கள், பொதுமக்கள் ஆகியோருக்கு எனது நன்றி.

ஊர் பொதுமக்கள் அதிரை அரசு மருத்துவமனையில் இன்று இரவு முதல் செயல்படுத்தி வரும் இரவு நேர மருத்துவ சேவையை நன்கு பயன்படுத்திக்கொள்ள வேண்டும். ஊர் பொதுமக்களின் வரவேற்பை பொறுத்தே இரவு நேர சேவை தொடர்ந்து வெற்றி பெற உதவியாக இருக்கும்' என்றார்.