டாக்டர் H. அப்துல் ஹக்கீம் அவர்களுக்கு சிறந்த மருத்துவச் சேவை விருது !

அதிரை சுற்றுவட்டார பகுதியின் பல்வேறு துறைகளை சார்ந்த சாதனையாளர்களை இனங்கண்டு அவர்களின் சேவைகளை ஊக்கப்படுத்தும் நோக்கில் 'அதிரை நியூஸ் கல்வி விருது - சாதனையாளர்கள் விருது 2015' என்ற பெயரில் விருது வழங்கும் விழா நேற்று மாலை அதிரை பேருந்து நிலையம் அருகே உள்ள சாரா திருமண மஹாலில் நடைபெற்றது.

அதிரையில் குறைந்த கட்டணத்தில் மருத்துவ சேவை, தனது நோயாளிகளின் உயர் சிகிச்சைக்காக சரியான மருத்துவரை பரிந்துரைத்து அனுப்பி வைப்பது. மேலும் அவர்களிடமிருந்து சலுகை கட்டணத்தில் சிகிச்சை அளிக்க பரிந்துரைப்பது. ஏழைகளுக்கு இலவச மருத்துவ ஆலோசனைகளை வழங்கி வருவது. அவசர சிகிச்சையின் போது நோயாளிகளுக்கு அளிக்கப்படும் குளோரபார்ம் பணிக்காக நேரம் காலம் பார்க்காமல் பணியாற்றி வருவது.

புற்றுநோயால் பாதிக்கப்பட்டவர்கள் சிகிச்சைக்காக தொலை தூரங்களில் காணப்படும் மருத்துவமனைகளுக்கு சென்று வந்தனர். இந்த குறையை போக்கும் விதமாக மருத்துவர்கள் பாலகிருஷ்ணன், மருதுதுரை, கெளசல்யா ஆகியரோடு இணைந்து தஞ்சையில் 'தஞ்சை கேன்சர் செண்டர்’ என்ற பெயரில் டிரஸ்ட் அமைத்து புற்று நோயால் பாதிக்கபட்ட நோயாளிகளுக்கு சிகிச்சை அளிக்கும் விதமாக புதிய மருத்துவமனையை கட்டி அதில் குறைந்த கட்டணத்தில்  சிகிச்சை வழங்கி வருகிறார். இதில் அதிரை மற்றும் சுற்றுவட்டார பகுதியில் புற்று நோயால் பாதிக்கப்பட்ட நோயாளிகளுக்கு சிகிச்சை வழங்கப்பட்டு வருகிறது. இந்த பணிகளில் டாக்டர் H. அப்துல் ஹக்கீம் முக்கிய பங்கு வகித்து வருகிறார். இந்த அறிய பணிக்காக டாக்டர் H. அப்துல் ஹக்கீம் அவர்களுக்கு இந்த விருது வழங்கப்படுகிறது. இவற்றை மாவட்ட சுகாதார நலப்பணிகள் இணை இயக்குனர் டாக்டர் D. மீனாட்சி வழங்கி கெளரவித்தார்.

சிறந்த மருத்துவ சேவை விருது பெற்ற டாக்டர் H. அப்துல் ஹக்கீம் அவர்களை நிகழ்ச்சியில் கலந்துகொண்ட பலரும் வாழ்த்தினர்.