கவிஞர் சபீர் அஹ்மது அபு ஷாஹ்ருக் அவர்களுக்கு சிறந்த கவிஞர் விருது !

அதிரை சுற்றுவட்டார பகுதியின் பல்வேறு துறைகளை சார்ந்த சாதனையாளர்களை இனங்கண்டு அவர்களின் பணிகளை ஊக்கப்படுத்தும் நோக்கில் 'அதிரை நியூஸ் கல்வி விருது - சாதனையாளர்கள் விருது 2015' என்ற பெயரில் விருது வழங்கும் விழா நேற்று மாலை அதிரை பேருந்து நிலையம் அருகே உள்ள சாரா திருமண மஹாலில் நடைபெற்றது.

சபீர் அபு ஷாஹ்ருக் என்கிற பெயரில் அதிரை நிருபர் , திண்ணை, சத்திய மார்க்கம் ஆகிய வலைதளங்களில் கவிதைகளைப் படைத்து வருகிறார். தற்போது ஷார்ஜாவில் ஒரு மிகப் பெரிய கன ரக வாகனங்களை விற்பனை செய்து வரும் நிறுவனத்தின் பணிமனை மேலாளராக பணியாற்றி வருகிறார். எளிய மொழிநடையில் இலகுவான வார்த்தைகளைக் கொண்டு மனத்தில் தாக்கம் ஏற்படுத்தும் வகையில் எழுதுவது இவர் பாணி.

“அனைத்துத் தெருக்களும் அதிரையின் கருக்கள்‘ என்று தொடங்கும் இவரது கவிதை துபாயில் நடைபெற்ற அதிரையின் அனைத்து மஹல்லா கூட்டமைப்பின் தொடக்க விழாவில் வாசிக்கப்பட்டு பலராலும் பாராட்டப்பட்டது.

மிகவும் எளிமையான வார்த்தைகளால் உயர்ந்த மனிதப் பண்புகளை கவிதையாக வெளிப்படுத்துவது கவிஞர் சபீர் அவர்களின் தனிச் சிறப்பு. குறிப்பாக அதிரையின் சிறப்புகள், குடும்ப நலன், மன உணர்வின் மேம்பாடுகள், இஸ்லாமிய மார்க்கம் சார்ந்த கவிதைகள் உள்ளிட்டவற்றை எழுதி வரும் பணிக்காக இந்த விருது வழங்கப்படுகிறது. இந்த விருதை மாவட்ட சுகாதார பணிகள் துணை இயக்குனர் டாக்டர் குணசீலன் வழங்கி கெளரவித்தார். விருதினை கவிஞர் சபீர் அஹ்மது அபு ஷாஹ்ருக் சார்பில், இவரது உறவினர் அஹமது இப்ராஹீம் பெற்றுச்சென்றார்.