பட்டுக்கோட்டையில் தமுமுகவின் 112வது ஆம்புலன்ஸ் சேவை துவக்கம் !

தமிழ்நாடு முஸ்லீம் முன்னேற்ற கழகத்தின் சார்பில் செயல்படுத்தி வரும் பல்வேறு சமூக சேவைகளில் ஆம்புலன்ஸ் சேவையும் ஒன்று. அனைத்து சமூதாய மக்களின் பாராட்டுதலையும் - வரவேற்பையும் பெற்று வரும் இந்த சேவையை பல்வேறு ஊர்களுக்கு விரிவு படுத்தப்பட்டும் வருகின்றது. இதற்காக தயாள மனம் படைத்த பலர் நிதிஉதவி செய்தும் வருகின்றனர்.

அதிரை அருகே உள்ள பட்டுக்கோட்டை பகுதிக்கு புதிதாக ஆம்புலன்ஸ் வாகனம் வாங்கி கிளையினரிடம் ஒப்படைப்பது என தமுமுகவின் முடிவையடுத்து, கடந்த சில வாரங்களுக்கு முன்பு வாகன டீலரிடம் முன்பதிவு செய்யப்பட்டது. ரூபாய் 8 லட்சம் மதிப்புள்ள இந்த வாகனத்தை விரைவில் பொதுமக்கள் பயன்பாட்டிற்கு கொண்டுவர அதன் நிர்வாகிகள் மும்முரமாக ஈடுபட்டு வந்தனர்.

கடந்த சில நாட்களுக்கு முன்பு தமுமுக நிர்வாகிகளிடம் ஆம்புலன்ஸ் வாகனம் ஒப்படைக்கப்பட்டதை தொடர்ந்து இன்று பட்டுகோட்டையில் அழகிரி நினைவரங்கில் நடைபெற்ற அர்பணிப்பு விழா - சமூக நல்லிணக்க பொதுக்கூட்டத்தில் தமுமுகவின் மூத்த தலைவரும், இராமநாதபுரம் சட்டமன்ற உறுப்பினருமாகிய பேராசிரியர் M.H. ஜவாஹிருல்லாஹ், மமக பொதுச்செயலாளர் M.தமிமுன் அன்சாரி, மாநில அமைப்பு செயலாளர் மதுக்கூர் K. ராவுத்தர்சா,  தலைமை கழக பேச்சாளர் திருச்சி A. ரபீக் ஆகியோர் சிறப்புரை வழங்கினார்கள்.

இதை தொடர்ந்து ஆம்புலன்ஸ் அர்பணிப்பு நிகழ்ச்சி நடைபெற்றது. இதில் டாக்டர் ஹாஜி M. அசரப் அலி ( பராக்கா )அவர்கள் ஆம்புலன்சின் சாவியை  தமுமுகவின் மூத்த தலைவரும், இராமநாதபுரம் சட்டமன்ற உறுப்பினருமாகிய பேராசிரியர் M.H. ஜவாஹிருல்லாஹ் அவர்களிடம் ஒப்படைத்தார்.

முன்னதாக வரவேற்புரையை தமுமுகவின் தஞ்சை தெற்கு மாவட்ட செயலாளர் அதிரை S. அஹமது ஹாஜா நிகழ்த்தினார்.

இவ்விழாவில் மாவட்ட - ஒன்றிய - கிளை நிர்வாகிகள் ஆகியரோடு பட்டுகோட்டை, அதிரை, மதுக்கூர், முத்துபேட்டை புதுபட்டினம், மல்லிபட்டினம், சேதுபாவாசத்திரம் பேராவூரணி உள்ளிட்ட ஊர்களின் தமுமுக- மமக நிர்வாகிகள் பலர் கலந்துகொண்டு சிறப்பித்தனர்.