கடற்கரை தெருவில் நீர்தேக்க தொட்டி அமைக்கும் பணி காலதாமதம் ஏன் ? சேனா மூனா விளக்கம் !

அதிரை பேரூராட்சிக்கு உட்பட்ட கடற்கரை தெரு 8 வது வார்டு பகுதியில் குடிநீர் தட்டுப்பாடு அவ்வபோது நிலவி வரும். இந்த பகுதியில் குடிநீர் பற்றாக்குறையை போக்குவதற்காக குடிநீர் தேக்க தொட்டி அமைத்து தர வலியுறுத்தி இப்பகுதியில் வாழும் பல்வேறு தரப்பினர் சம்பந்தபட்டோரிடம் தொடர் கோரிக்கை வைத்து வந்தனர்.

இதுதொடர்பாக துபாயில் நேற்று நடைபெற்ற கடற்கரைதெரு அமீரக அமைப்பின் பொதுக்குழு கூட்டத்தில் குடிநீர் தேக்க தொட்டி துவங்கும் பணி தாமதமாவதை குறிப்பிட்டு அதிருப்தியை வெளியிட்டிருந்தனர்.

இதுகுறித்து அதிரை பேரூராட்சியின் 8 வது வார்டு உறுப்பினர் சேனா மூனா ஹாஜா முகைதீனை தொடர்புகொண்டு கேட்டபோது...
'கடற்கரைதெரு பகுதியில் குடிநீர் பற்றாக்குறையை போக்க குடிநீர் தேக்க தொட்டி கட்டுவது என்பது மஹல்லாவாசிகளின் நீண்ட நாள் திட்டம். இதற்காக நான் வார்டு கவுன்சிலராக பொறுப்பேற்று பிறகு பல்வேறு நடவடிக்கைகளில் ஈடுபட்டு வருகிறேன். குறிப்பாக சம்பந்தபட்டோரிடம் முறையிட்டு வருகிறேன்.

குடிநீர் தேக்க தொட்டி அமைக்க 4 ஆயிரம் சதுர அடியில் நிலம் அரசிற்கு வழங்க வேண்டி இருக்கிறது. அப்போதுதான் குடிநீர் தேக்க தொட்டி அமைக்க முடியும். கடற்கரை தெரு பகுதியில் தர்ஹாக்கு சொந்தமான வக்ப் போர்டு நிலம் உள்ளது. இதில் ஒரு பகுதியில் நீர்தேக்க தொட்டி அமைக்க நிலம் வழங்க கோரி கடந்த [ 04-11-2014 ] அன்று அதிரைக்கு வருகை தந்த மாண்புமிகு தமிழ்நாடு வக்பு வாரிய தலைவர் தமிழ்மகன் உசேன் அவர்களிடம் கோரிக்கை மனு வழங்கினேன். அப்போது பரிசிலிப்பதாக கூறினார். நீர் தேக்க தொட்டி அமைக்க தொடர்ந்து முயற்சித்து வருகிறேன். இடம் கிடைப்பதில் தாமதமாவதால் நீர்தேக்க தொட்டி அமைக்கும் பணி காலதாமதமாகி வருகிறது' என்றார்.