ஜலாலின் கைதை கண்டித்து தஞ்சையில் எஸ்.டி.பி.ஐ தடையை மீறி ஆர்ப்பாட்டம் ! - 100 க்கும் அதிகமானோர் கைது !

மல்லிப்பட்டினத்தில் எஸ்.டி.பி.ஐ கட்சியின் தஞ்சை தெற்கு மாவட்ட செயலாளர் ஜலாலின் கைதை கண்டித்து, தஞ்சாவூரில் நேற்று (09-06-2014) மாலை ஆர்ப்பாட்டம் நடைபெற்றது. இதில் எஸ்.டி.பி.ஐ கட்சியின் மாநில செயலாளர் நாஞ்சில் செய்யதலி தலைமையில் தடையை மீறி நடந்த இந்த ஆர்ப்பாட்டத்தில், எஸ்.டி.டி.யூ மாநில தலைவர் ஃபாரூக், மாநில துணைத் தலைவர் சம்சுதீன் உள்பட நூற்றுக்கும் மேற்ப்பட்டோர் ஆர்பாட்டத்தில் கலந்துகொண்டனர்.

கடந்த மாதம் 28-ஆம் தேதி மல்லிப்பட்டிணத்தில் 4 முஸ்லிம் இளைஞர்கள் தாக்கப்பட்டதை கண்டித்தும், அந்த விவகாரத்தில் உரிய நடவடிக்கை எடுக்க வேண்டும். பாதிக்கப்பட்டவர்களுக்கு உரிய நிவாரணம் வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி தஞ்சாவூர் ரயிலடியில் திங்கள்கிழமை மாலை கண்டன ஆர்ப்பாட்டம் நடத்துவதாக எஸ்டிபிஐ கட்சியினர் அறிவித்திருந்தனர்.

ஆர்ப்பாட்டத்துக்கு போலீஸார் அனுமதி அளிக்கவில்லை. ஆனாலும் தடையை மீறி திங்கள்கிழமை மாலை அக்கட்சியினர் ஆர்ப்பாட்டம் செய்ய முயன்றனர். அனுமதியின்றி ஆர்ப்பாட்டத்தில் ஈடுபட முயன்ற 92 பேரை தஞ்சாவூர் மாநகர காவல் துணை கண்காணிப்பாளர் கண்ணன் தலைமையிலான போலீஸார் கைது செய்து, தனியார் மண்டபத்துக்கு அழைத்துச் சென்று தங்கவைத்தனர்.