அதிரை நியூஸின் முக்கிய அறிவிப்பு !

அன்பான அதிரை நியூஸ் வலைதளத்தின் பதிவர்களுக்கும் வாசகர்களுக்கும் கருத்திடுபவர்களுக்கும் அதிரை நியூஸ் நிர்வாகத்தின் அன்பான வேண்டுகோளுடன் கூடிய அறிவிப்பு.

அதிரை நியூஸ் வலைத்தளத்தின் நோக்கம் அதிரை மற்றும் அதன் வட்டாரப்பகுதிகளில் நடக்கும் அன்றாட நிகழ்வுகளை சாதி மத இன பேதமின்றி வெளியிட்டு அதிரையின் அனைத்து மக்களின் கவனத்துக்கும் சென்று சேர்க்க வேண்டுமென்பதே.

அவ்வகையில்தான் எவ்வித தவறும் நிகழ்ந்துவிடாதவகையில் இந்த வலைத்தளம் தொடங்கிய காலம் முதல் சுத்தமான மனதுடன் தொடர்ந்து பணியாற்றி வருகிறோம்.

அதே முறையில்தான் கருத்துச் சுதந்திரங்களுக்கு எவ்வித தடையும் போடாமல் அனைவரின் கருத்தையும் தடை இல்லாமல் பிரசுரித்தும் வருகிறோம்.

கடந்த சில வாரங்களாக நாம் இடும் செய்திகளுக்கு இடப்படும் பின்னூட்டங்களில் தனி நபர் விமர்சனங்களும்  சாதிமத இனத் தாக்குதல்களும் வார்த்தைகளால் மற்றவர்களைப் புண்படுத்துவது போன்ற அம்சங்களும் அமைந்து இருப்பதை நாம் வருத்தத்துடன் உணர முடிகிறது.

அதிரை நியூஸ் தனது கண்ணியத்தை கட்டிக் காக்க நினைக்கிறது. இந்த மண்ணில் சகோதரத்துவமும் சமத்துவமும் தழைத்து வளர்ந்திருக்கிறது. அண்மைக்கால அரசியல் நடவடிக்கைகளால் சமதாயத்தின் பிரிவினர்கள் ஒருவரை ஒருவர் வார்த்தைகளால்  தாக்கிக் கொள்வதற்கு அதிரை நியூசை ஒரு களமாகப் பயன்படுத்துவதை நிர்வாகம் அனுமதிக்காது என்பதை தெரிவித்துக் கொள்கிறோம்.

நமது ஊரின் பண்பாட்டையும் காலம் காலமாக நாம் கட்டிக் காத்துவரும் கலாச்சாரத்தையும் சிலருடைய வார்த்தைக் குண்டுகள் அதிரை  நியூசைப் பயன்படுத்தி  துளைப்பதை நாம் அனுமதிக்க தயாரில்லை என்பதை வருத்தத்துடன் தெரிவித்துக் கொள்கிறோம். தேன் கூட்டை  கலைப்பதற்காக சிலர் செய்யும் முயற்சிகளுக்கு வழிவகுத்துக் கொடுப்பது எமது நோக்கங்களில் ஒன்றல்ல.

யாரையும் புண்படுத்தாத எவரையும் காயபடுத்தாத பின்னூட்டங்கள் மட்டுமே இனி அனுமதிக்கப்படும். இந்த நற்பண்பைக்  கட்டிக் காப்பாற்றாத ஒற்றுமைக்கு ஊரு விளைவிக்ககூடிய  பின்னூட்டங்கள் நிச்சயமாக நீக்கபடுமென்பதை தெரிவித்துக் கொள்கிறோம்.

எவராக இருந்தாலும் தங்களின் கருத்தை பண்புடனும் கண்ணியத்துடன் பதிய நினைத்தால் அவர்களை அதிரை நியூஸ் ஊக்கபடுத்தி வரவேற்கும்.

என்றும் உங்களின் அன்பான சேவையில்,

அதிரை நியூஸ்.