சம்பவங்களும் ! மனக் குமுறல்களும் !! நடந்தது என்ன ?

சம்பவங்கள் பலவகைப்படும், அதில் ஒன்றுதான் இந்த சம்பவம், அதாவது நேற்று அதிரை நியூஸ்.நெட் இணையதளத்தில் “மருத்துவரின் அலட்ச்சியத்தால் தாயாரை பறிகொடுத்த அதிரை சகோதரரின் குமுறல்” http://www.adirainews.net/2014/06/blog-post_7.html என்ற தலைப்பில் தாங்கிக் கொள்ள முடியாத சம்பவம் செய்தியாக பதியப்பட்டது. இது வரை பார்த்தவர்கள் 1168 பேர்கள், பின்னூட்டம் வாயிலாக தங்கள் கருத்துகளை சொன்னவர்கள் 17 பேர்கள்.

பல தேச எல்லைகளைக் கடந்து அயல் தேசத்தில் வாழும் சகோதரர் சம்சுதீன் அவர்களுடைய மனம் சமாதானம் அடைய, தைரியம் கொள்ள, பொறுமையை கையாள, அவர் தாயாருடைய மறுமை வாழ்க்கை வெற்றியாக அமைந்திட, யா அல்லாஹ் நீ போதுமானவன். ஆமீன்.

பின்னூட்ட கருத்துக்கள் அனைத்தும் சாதாரணமானது அல்ல, ஒவ்வொருத்தருடைய காரணமான மனக் குமுறல்கள் இங்கு பின்னூட்டங்களாக பிரதிபலிக்கின்றது.

இந்த சம்பவத்திற்கு முன் பல சம்பவங்கள் நமதூர் வலைதளங்களில் பதியப்பட்டு இருக்கின்றன, அவைகளில் 90% சதவிகித பதிவுகள் படித்தவரின் மனக் குமுறல்களாக பின்னூட்டவடிவில் பிரதிபலித்திருக்கின்றது.

இந்த மனக் குமுறல்கள் அனைத்தும் எந்த நிலை(LEVEL)  வரைக்கும் போய் நிற்கின்றது என்று சற்று ஆராய்ந்து பாப்போம்.

இணையதளம் வருவதற்கு முன் நடத்த சம்பவங்களை ஆட்கள், கடிதங்கள், தந்தி, செய்தித்தாள்கள், வானொலிகள், தொலைபேசிகள், தொலைநகல்கள், தொலைக் காட்ச்சிகள், இப்படி பலவகை ஊடக வாயிலாக அறிந்தோம்.

அன்றைய சம்பவங்களும் பின்னூட்டங்களும் ஒருவரை ஒருவர் சந்திக்கும் வேளையிலும், பலர் பல இடங்களில் கூடும் வேளையிலும் அறியப்பட்டு பகிரப்பட்டு வந்தது.

நான் 1982-1994களில் சவூதி அரேபியா தேசத்தில் அல்-ரியாத் பட்டணத்தில் பணியில் இருந்த சமயம், ஒவ்வொரு வெள்ளிக்கிழமையும் மாலை நேரங்களில் பத்தாஹ் நகரம் சென்று ராடோ பில்டிங் அருகில் கூடும் நமதூர் சகோதரர்களை சந்திப்பது வழக்கம். ஊரில் நடக்கும் அனைத்து சம்பவங்களும் கடிதங்கள் மூலமாக வந்தடைந்துவிடும், அது ஒவ்வொருத்தர் வாயிலாக வெளிவரும், அதைக் கேட்டுக்கொண்டு இருக்கும் மற்றவர்களும் தங்களுடைய மனக் குமுறல்களை தெரிவித்து கொண்டு இருப்பார்கள், இப்படியே நேரமும் போய்க் கொண்டே இருக்கும், இதற்கிடையில் மஃரிப் தொழுகை நேரமும் வந்துவிடவே முத்தவா சல்லு சலாஹ்! சல்லு சலாஹ்!! என்று சொல்லிக் கொண்டு கையில் ஒரு பிரம்போடு வரும்போது கூட்டம் கலைந்துவிடும், பின்பு சேரும், மீண்டும் கலைந்துவிடும், இறுதியில் அவரவர் இடத்திற்கு அவரவர் சென்று விடுவார்கள்.

மறுநாள் சனிக்கிழமை, அவரவர் வேளையில் அவரவருடைய பொழுது போய்க் கொண்டே இருக்கும் இந்த வேலைகளுக்கு இடையில் வந்த கடிதத்திற்கு பதில் எழுதணும், சமையல் சாமான்கள் வாங்கணும், மற்ற இயல்பான வேலைகளையும் கவனிக்கணும், மறுபடியும் வெள்ளிக்கிழமை வந்துவிடும்,  மீண்டும் பத்தாஹ் நகரம், அதே வசனம், அதே மனக் குமுறல்கள், நேரம் போச்சு, திரும்பி ரூமுக்கும் வந்தாச்சு, இப்படியே பல வெள்ளிக்கிழமைகள் அங்கு அன்று கழிக்கப்பட்டது.

யாரு வேண்டுமானாலும் குமுறலாம் ஆனால் குறிக்கோளோடு குமுறவேண்டும். குமுறப்பட்ட அனைத்து மனக் குமுறல்களும் எந்த நிலையில் இருக்கின்றது? அதை யாராவது சிந்தித்து பார்த்தது உண்டா?

யாரையும் குறை கூறியோ அல்லது குற்றப் படுத்தியோ நான் இப்படி எழுத வில்லை, நமக்குள் ஒத்துழைப்பு இருந்தால், எல்லோருடைய மனக் குமுறல்களும் ஒன்று சேர்ந்து செயல்பட்டால் எல்லா மக்களும் பயன் பெறுவார்கள் என்பதில் ஒரு இம்மிகூட சந்தேகம் இல்லை.

நுகர்வோர் மற்றும் மனித உரிமை இயக்கத்தில் இணைந்து செயல்பட நானும் ஒவ்வொருத்தராக கேட்கின்றேன், இது அரசியல் சாராதது. மதம், இனம், நிறம், மொழி இவைகளுக்கு அப்பாற்பட்டது.

சாதிப்பது என்றால், அது சாதிக்க நினைக்கும் காரியத்தை பொறுத்தது. ஒரு சில காரியங்களை தனியொரு மனிதனால் சாதித்துவிட முடியும். இன்னும் பல காரியங்களுக்கு பக்கபலம் பின்பலம் பொருளாதாரபலம் இவை அனைத்தும் வேண்டும். இவைகளுக்கு மேலாக வல்ல இறைவனின் கிருபையும், அன்பும், விருப்பமும், நாட்டமும் வேண்டும்.

நம் எல்லோர்களுடைய விருப்பமும் நல்லதை நாடும்போது வல்ல இறைவனும் துணை இருப்பான். ஆமீன்.

இப்படிக்கு.

K.M.A. JAMAL MOHAMED.

Consumer & Human Rights.

Thanjavur District Organizer, Adirampattinam-614701.

consumer.and.humanrights614701@gmail.com