தஞ்சையில் தமுமுகவின் 119 வது புதிய ஆம்புலன்ஸ் சேவை துவக்கம் !

தமிழ்நாடு முஸ்லீம் முன்னேற்ற கழகத்தின் சார்பில் செயல்படுத்தி வரும் பல்வேறு சமூக சேவைகளில் ஆம்புலன்ஸ் சேவையும் ஒன்று. அனைத்து சமூதாய மக்களின் பாராட்டுதலையும் - வரவேற்பையும் பெற்று வரும் இந்த சேவையை பல்வேறு ஊர்களுக்கு விரிவு படுத்தப்பட்டும் வருகின்றது. இதற்காக தயாள மனம் படைத்த பலர் நிதிஉதவி செய்தும் வருகின்றனர்.

இந்நிலையில் தஞ்சை மற்றும் சுற்று வட்டாரபகுதியில் வசிக்கும் பொதுமக்கள் பயன்பெரும் வகையில் புதிதாக ஆம்புலன்ஸ் வாகனத்தை பொதுமக்கள் பயன்பாட்டிற்கு கொண்டுவர அதன் நிர்வாகிகள் மும்முரமாக ஈடுபட்டு வந்தனர். இந்நிலையில் தமுமுகவின் 119  வது ஆம்புலன்ஸ் அர்பணிப்பு விழா மற்றும் சமூக நல்லிணக்க பொதுக்கூட்டம் இன்று 13-03-2015 மாலை தஞ்சையில் நடைபெற்றது.

கூட்டத்திற்கு தமுமுக தஞ்சை தெற்கு மாவட்ட தலைவர் ஐ.எம் பாதுஷா தலைமை வகித்தார். சிறப்பு விருந்தினராக தமுமுக மூத்த தலைவர் பேராசிரியர் ஜவாஹிருல்லா எம்எல்ஏ, தமுமுக பொது செயலாளர் அப்துல் சமது, மமக மாநில அமைப்பு செயலாளர் ராவுத்தர்ஷா ஆகியோர் கலந்து கொண்டு ஆம்புலன்ஸ் சேவையை துவக்கி வைத்து சிறப்புரை நிகழ்த்தினார்கள்.

முன்னதாக தஞ்சை தெற்கு மாவட்ட செயலாளர் அதிரை அஹமது ஹாஜா வரவேற்புரை ஆற்றினார். கூட்டத்தின் இறுதியில் தஞ்சை நகர தமுமுக செயலாளர் ஏ.எம் சித்திக் நன்றி கூறினார். இந்நிகழ்ச்சியில் ஏராளமான பொதுமக்கள் கலந்துகொண்டனர்.