அபாயம் ! பயங்கரம் !! அதிர்ச்சி ரிப்போர்ட் !!! ஆண் துணை இல்லாத பெண்கள் !!! ஆனால் உண்மை!?

பொதுவாக எல்லா பெண்களின் நலன் கருதி எழுதப்பட்டதாகும்.

பெண்களை தாயாகவும், சகோதரிகளாகவும், போற்றிவந்த இவ்வுலகில் அதுவும் இன்றைய கால கட்டத்தில் பல பெண்களின் நிலை மிகவும் மோசமானதாக இருக்கின்றது, பாதுகாப்பு இல்லாமல் இருக்கின்றது, சில ஆண்களின் கேளிக்கை பொருளாக இருக்கின்றது, படு கேவலமாக இருக்கின்றது, பல ஊடகங்களிலும், சமூக வலைதளங்களிலும் புகைப்படத்தோடு அம்பலமாகிக் கொண்டிருக்கின்றது.

இப்படி ஒரு புறம் இருக்க இஸ்லாமிய பெண்கள் இஸ்லாத்தில் அனுமதிக்கப்பட்ட ஆண் துணை இல்லாமல் பல இடங்களுக்கு தனியாக சென்று வருகின்றனர். இதை பார்க்கும்போது மிகவும் கவலையாக இருக்கின்றது.

நோன்புப் பெருநாள், ஹஜ்ஜுப் பெருநாள், இந்த இரண்டு பெருநாள் தினத்தை நாம் விமர்சையாக கொண்டாடி வருகின்றோம், இது இஸ்லாம் தோன்றிய காலம் தொட்டே நடந்து வருகின்றது. மேலும் இதற்கு இடையே திருமணம் போன்ற விஷேசங்களுக்கும் வந்து போகின்றது.

புது ஆடைகள், வீட்டு உபயோகப் பொருட்கள்,  மேலும் விரும்பிய பொருட்கள் வாங்க வேண்டுமானால் நமதூரையே நாடலாம், விரும்பியது இங்கு இல்லையென்றால் நமதூருக்கு அருகில் இருக்கும் பட்டுக்கோட்டையே போதும், இன்று பட்டுக்கோட்டையில் எல்லா விதமான சாமான்கள் வகை வகையாக தடை இல்லாமல் கிடைத்துக் கொடிருக்கின்றது, விரும்பிய மாடல்கள் இங்கு இல்லையென்றால் அடுத்தது தஞ்சாவூர் அல்லது திருச்சி அல்லது மதுரை அல்லது சென்னை இப்படி பல பெறுநகரங்களில் போய் வாங்கலாம். அதே சமயத்தில் இஸ்லாத்தில் அனுமதிக்கப்பட்ட தகுந்த ஆண் துணையோடு போகவேண்டும் என்று ஒரு நிர்பந்தம் இருக்கின்றது. இதை யாரும் விரும்புவது கிடையாது.

ஆண்களால் பெண்களுக்கு இழைக்கப்படும் இன்னல்கள் ஏராளாம், வெளியில் வந்தது சொற்பமே, வராதது அதிகமே.

அண்மையில் சில மாதங்களுக்கு முன் அதிரை முத்துப்பேட்டை இ.சி.ஆர். சாலையில் அவ்வழியே செல்லும் சில வாகனங்களை வழிமறித்து பெண்களுக்கு இடைஞ்சல் கொடுத்தது எல்லோரும் அறிவோர்.

சில மருத்துவர்கள், சில ஆசிரியர்கள், சில முதலாளிகள், சில மத குருமார்கள் இப்படி பல ஆண் முதலைகள் பெண்களை நாசப்படுத்திக் கொண்டிருக்கும் சம்பவங்கள் அடிக்கடி பல ஊடக வாயிலாக தினம் தினம் அறிகின்றோமே.   

கடந்த சில வருடங்களாக நமதூரில் இருந்து நூற்றுக்கும் மேற்பட்ட இளம் வயது பெண்கள் ஒன்றாக சேர்ந்து 16பேர்கள் அமரக்கூடிய பல மினிபஸ்களை வாடகைக்கு எடுத்து காலை 6.30மணிக்கு வீட்டிலிருந்து புறப்பட்டு திருச்சியை அடைந்து அங்கேயே பகல் பொழுதை கழித்துவிட்டு, பல கடைகள் ஏறி இறங்கி தாங்கள் விருப்பப்பட்ட புது ஆடைகளை வாங்கினதோடு நின்று விடாமல் மற்ற கடைகளுக்கும் கூட்டம் கூட்டமாக சென்று இன்னும் பிற சாமான்களையும் வாங்கி மாலையானவுடன் மினி பஸ் இறக்கிவிட்ட இடத்திற்கு வந்து பஸ்ஸில் ஏறி பல வழி தடங்களை கடந்து இரவு 9.30மணிக்கு வீட்டை வந்து அடைகின்றனர்.

“இவ்வளவும் தகுந்த ஆண் துணை இல்லாமல்”

பெண்களே, ஊர் திரும்பும் வழியில் போராட்டம், கலவரம், ஸ்டிரைக், ஹர்த்தால், விபத்து, சூறாவளி, அடைமழை, பாலம் உடைப்பு போன்ற சம்பவங்களினால் போக்குவரத்து பல மணி நேரங்கள் நகர முடியாமல் ஸ்தம்பித்து விட்டது என்று வைத்துக் கொள்வோம்., மேலும் இரவு நேரம் வேறு, எவ்வளவு துன்பங்களை நீங்கள் அனுபவிக்க நேரிடும், அந்த சமயத்தில் உங்களால் என்ன செய்ய முடியும்? நீங்கள் என்ன அவ்வளவு பெரிய பலசாலிகளா? சிறிய கரப்பான் பூச்சியைக் கண்டால் ஆ!!ஓ!!! என்று அலறும் நீங்களா இப்படியான காரியத்தை செய்வது? அப்படி ஒரு அசம்பாவிதம் ஏற்பட்டால் அதுக்கு யாரு பொறுப்பு? சமுதாயமா அல்லது குழுவாக போகும் தோழிகளா அல்லது இடைப்பட்ட ஊர் மக்களா அல்லது மினி பஸ்ஸா அல்லது ஓட்டுனரா அல்லது கணவனா அல்லது பெற்றோர்களா?

இதே நீங்கள் ஆண் துணையோடு போயிருந்தால் இப்படி கூட்டமாக போயிருக்க மாட்டீர்கள்,  உங்கள் வீட்டு ஆண் துணையோடு விருப்பப்பட்ட நேரத்தில் விருப்பப்பட்ட வாகனத்தில் விருப்பப்பட்ட இடத்திற்கு பத்திரமாக போய்விட்டு திரும்புவீர்கள். வரும் வழியில் மேலே சொல்லப்பட்ட சம்பவங்கள் ஏதும் ஏற்பட்டாலும் ஆண் துணை அருகில் இருக்கும்போது உங்களுக்கு தைரியம் இருக்கும், மேலும் உங்களுக்காக துணையோடு வந்த ஆணும் உங்களுக்கு ஏதும் நடக்கா வண்ணம் பாதுகாத்துக் கொள்வார்.

தனித்து போக பெண்களுக்கு இஸ்லாத்தில் அனுமதி இல்லை! இஸ்லாமிய மார்க்க வல்லுனர்கள் தகுந்த நடவடிக்கை எடுக்க வேண்டும். இனிவரும் நாட்களில் இப்படி நடக்காமல் இருக்க ஒரு முற்றுப்புள்ளி வைக்க வேண்டும்.

தனித்து போக விரும்பும் பெண்களே, இந்த உலகம் ஒவ்வொருத்தரையும் சந்தேகக் கண்ணோடுதான் பார்கின்றது, இருந்தாலும் உங்களை யாரும் குறைகூறி குற்றம் சுமத்தவில்லை. அவரவர் தன்னைத்தானே நன்கு ஆராய்ந்து பாருங்கள். அதே சமயம் வெளிநாட்டில் வாழும் கணவர்மார்களும் தம் தங்கள் குடும்ப விஷயங்களில் மிகவும் கவனமாக இருக்க வேண்டும்.

 

இந்தக் கட்டுரை இஸ்லாம் பெண்களுக்கு மாத்திரமன்றி எல்லா பெண்களுக்கும் பொருந்தும் வகையில் எழுதப்பட்டதாகும்..

இப்படிக்கு.

கோ.மு.அ. ஜமால் முஹம்மது.

த/பெ. (மர்ஹூம்) கோ.முஹம்மது அலியார்.

Human Rights and Consumer Rights Included.

Thanjavur District Organizer. Adirampattinam-614701.

kmajamalmohamed@gmail.com