அபுதாபியில் நோன்பு இருந்து வரும் இந்து சமய பெண்!

அபுதாபி : ஏப்.27
அபுதாபியில் இந்து சமயத்தை சேர்ந்த ஸ்ரீதேவி சிவானந்தம் நோன்பினை நோற்று வருகிறார்.

அமீரகத்தில் தற்போது ரமலான் மாதம் தொடங்கியுள்ளது. இந்த மாதத்தில் இஸ்லாமியர்கள் நோன்பினை நோற்று வருகிறார்.

இந்த நிலையில் அபுதாபியில் வசித்து வரும் இந்து சமயத்தை சேர்ந்த ஸ்ரீதேவி சிவானந்தம் நோன்பு நோற்று சமய நல்லிணக்கத்துக்கு எடுத்துக்காட்டாக திகழ்ந்து வருகிறார்.

ரமலான் மாத நோன்பு என் நம்பிக்கையின் அடையாளம் என அவர் குறிப்பிட்டுள்ளார்.

மத மாச்சர்யங்களும், சண்டை சச்சரவுகளும் பெருகி, ஒரு பக்கம் மனித இனத்தின் நிம்மதியைக் கெடுத்து வந்தாலும், இஸ்லாமிய நோன்பு மாதமான ரமலானில் பயபக்தியுடன் நோன்பு நோற்கும் ஸ்ரீதேவி சிவானந்தம், சமயங்கள் கடந்த மனித நேயத்திற்கான ஒரு தலை சிறந்த உதாரணமாகத் திகழ்கிறார்.

அதிகாலை நேரமான சஹர் நேரத்தில் அவரிடம் பேசினோம்.

இதோ நோன்பு மாதமான ரமலான் குறித்த அவரது நம்பிக்கை:
"இறைவன் மதங்களையெல்லாம்  கடந்தவன். அதனால் தான், தமிழர்களாகிய நாம் அவனை கடவுள் என்கிறோம். நிச்சயமாக மனித குலம் முழுவதையும் படைத்தது ஒரே இறைவன்தான்.

நான் இஸ்லாமிய நோன்பு மாதமான ரமலானில் சில நேர்த்திக் கடன்களை மனதில் வைத்தே, கடந்த பல வருடங்களாக நோன்பு நோற்று வருகிறேன்.

அதிகாலை சஹரில் எழுந்து உணவருந்துகிறேன். மாலை பாங்கு சொன்னவுடன் நோன்பு திறக்கிறேன்.

எல்லாம் வல்ல இறைவன், நான் வேண்டிய  பலவற்றை, இந்த ரமலான் மாதத்தின் பொருட்டால் எனக்குத் தந்தருள்கிறான் என்று உறுதியாக நம்புகிறேன்.

என்னோடு பசித்திருந்து, விழித்திருந்து, ஏழை எளியவர்க்கு ஈகை தந்து, நோன்பு நோற்கும் உலக முஸ்லிம் சகோதர சகோதரிகள் அனைவருக்கும் என் மன மார்ந்த வாழ்த்துக்களும் பிரார்த்தனைகளும், ரமலான் முபாரக்"

 இவ்வாறு அவர் கூறினார்.