சாலை மேம்படுத்தும் பணியால் பள்ளமாக காட்சியளிக்கும் பேருந்து நிலைய பகுதி !

அதிரை பேருந்து நிலையத்திலிருந்து பட்டுக்கோட்டை செல்லும் ஈசிஆர் இணைப்பு சாலை நீண்ட காலமாக சீர் செய்யப்படாததால் இந்த சாலை வழியே செல்லும் வாகன ஓட்டிகளும், பொதுமக்களும், பள்ளி கல்லூரி செல்லும் மாணவ மாணவிகளும் மிகவும் அவதியுற்று வந்தனர்.

இந்நிலையில் அதிரை பொதுமக்களுக்கு மகிழ்ச்சியை ஏற்படுத்தும் வகையில்,'தமிழக அரசின் நெடுஞ்சாலை துறை சார்பில் அதிரை பேருந்து நிலையத்திலிருந்து சேர்மன்வாடி வழியாக பட்டுக்கோட்டை செல்லும் சாலையை 800 மீட்டர் தூரத்தில், 7 மீட்டர் அகலத்தில் மேம்படுத்தும் விதத்தில் சுமார்  ₹ 1.50 கோடி மதிப்பீட்டில் கடந்த [ 13-11-2014 ] அன்று டெண்டர் விடப்பட்டது.

இதற்கான முதற்கட்ட பணிகள் கடந்த [ 27-12-2014 ] அன்று துவங்கியது. இதில் அதிரை பேரூந்து நிலைய ஈசிஆர் இணைப்பு சாலையிலிருந்து - பட்டுக்கோட்டை செல்லும் 800 மீட்டர் வரையிலான சாலையின் இருபுறமும் நெடுஞ்சாலைதுறைக்கு சொந்தமான இடத்தில் இருந்த ஆக்கிரமிப்புகளை அகற்றும் பணியில் காவல் துறை உதவியுடன் நெடுஞ்சாலை துறையினர் ஈடுபட்டனர். இதையடுத்து பேருந்து நிலையத்திலிருந்து பட்டுக்கோட்டை செல்லும் சாலையை மேம்படுத்தும் பணி தீவிரமாக நடைபெற்று வருகிறது.

இந்நிலையில் பேருந்து நிலையப்பகுதியில் காணப்படும் சாலை முழுவதையும் அகலப்படுத்தியும், உயர்த்தியும் வருகின்றனர். இதனால் சாலையை ஒட்டி காணப்படும் கடைகள் பள்ளத்தில் மூழ்கியது போல் காட்சியளிக்கிறது. பேருந்து நிலையமும் பள்ளமாக காட்சியளிக்கிறது. இனிவரும் மழைகாலங்களில் தாழ்வாக காட்சியளிக்கும் பகுதியில் தண்ணீர் தேங்கி நிற்க வாய்ப்பு இருப்பதாக ஆர்வலர்கள் கருத்து தெரிவித்துள்ளனர். தண்ணீர் தேங்கி நிற்பதை தடுக்கும் வகையில் முறையான வடிகால் வசதி ஏற்படுத்த வேண்டும் என கோரிக்கை எழுந்துள்ளது.