நபிகள் நாயகத்தை விமர்சித்து முகநூலில் கேலிச்சித்திரம் வெளியிட்ட நபர் மீது வழக்குப் பதிவு !

அதிராம்பட்டினம், டிச.02
நபிகள் நாயகத்தையும், குர்ஆன்னையும் விமர்சித்து வரைந்த கேலிச்சித்திரத்தை முகநூலில் பரப்பிய நபர் மீது தஞ்சாவூர் மாவட்டம், அதிராம்பட்டினம் காவல் நிலையத்தில் வழக்குப் பதிவு.

இஸ்லாமியர்களின் புனிதமிகு நூல் திருக்குர்ஆன்னையும், இறைவனின் இறுதித் தூதர் முகம்மது நபி (ஸல்) அவர்களையும், விமர்சித்து வரைந்த கேலிச்சித்திரத்தை நேற்று வெள்ளிக்கிழமை முகநூலில் பரப்பிய சந்தோஷ் தனபால் என்பவர் மீது, அதிராம்பட்டினத்தை சேர்ந்த ஏ.ஜே ஜியாவுதீன் அளித்த புகாரின் பேரில், அதிராம்பட்டினம் காவல் நிலைய ஆய்வாளர் பி.தியாகராஜன் வழக்கு பதிந்து விசாரணை நடத்தி வருகிறார்.

புகார் மனுவில் ஏ.ஜே. ஜியாவுதீன் கூறியிருப்பதாவது; எதிர்வரும் டிச.6  ஐ முன்னிட்டு தமிழகத்தில் கலவரத்தை ஏற்படுத்தும் நோக்கத்தில், சந்தோஷ் தனபால் என்ற பெயரில் எங்கள் உயிரினும் மேலான மார்க்கத்தையும், குர்ஆனையும் மற்றும் நபிகள் நாயகத்தையும் கேலிச்சித்திரம் வரைந்து முகநூலில் பரப்பி வருகிறார். தமிழகத்தில் மதநல்லிணக்கத்தை சீர்குலைக்க திட்டமிட்டு சதி செய்து, இதுபோன்ற கேலிச்சித்திரப் பதிவுகளை இணையதளங்களில் பரப்பி வருகிறார். இதனால் மக்களிடேயே மதமோதல்கள் ஏற்பட இப்பதிவு காரணமாக அமைந்துவிடலாம். ஆகையால், இவர் யார் என கண்டறிந்து, இவர் மீது வழக்கு பதிந்து உரிய தண்டனை வாங்கித்தருமாறும், பிரச்சனைக்குரிய பதிவை முகநூலில் இருந்து நீக்கிடவும், கடுமையாக எச்சரித்து இணையதளங்களில் வரக்கூடிய மதத்தூவேஷப் பதிவுகளை அனுமதிக்காதவாறும் உலக முஸ்லீம்கள் மற்றும் அதிரை முஸ்லீம்கள் சார்பாகக் கேட்டுக்கொள்கிறேன்' என புகாரில் தெரிவித்துளார்.