ஒப்பந்தமாம் ! ஒப்பந்தம் ! சமுதாயத்தின் மானத்தை விற்கும் ஒப்பந்தம் !?

அண்மையில் நமது அருமை அதிரையிலிருந்து ஒரு அழகான செய்தி வந்தது. செய்தியைக் கேட்டு இவ்வளவு நாட்களாக உடம்பு புல்லரிக்கிறது என்ற வார்த்தைக்கு அர்த்தம் தெரியாமல் பலர் தடுமாறிக் கொண்டு இருந்தார்கள்.இப்போது, எம்மில் பலருக்கு இப்போது புரிந்து விட்டது. பீடிகை பலமாக இருக்கிறதே என்று நினைக்க வேண்டாம். பலரின் மனக்குமுறலையே இங்குப் பகிர விரும்புகிறோம். மற்றபடி நாம் எழுதப் போகும் பிரச்னையில் தொடர்புடைய அனைவருக்கும் இறைவன் ஒற்றுமையை பலப்படுத்தி கொடுப்பானாக என்று வேண்டிக் கொண்டே இந்தப் பதிவைத் தொடர்கிறோம்.

நமது வாழ்நாளில் எவ்வளவோ ஒப்பந்தங்களைப் பார்த்து இருக்கிறோம். திருமணம் கூட ஒரு ஒப்பந்தம்தான்- வணிகத்திலும் அடிப்படை வாய்வழி அல்லது எழுத்துவழி ஒப்பந்தம்தான் நிறைவேர்ரபடுகிறது.  உலக வங்கியில் நாடுகள் கடன் வாங்குவதற்கும் ஒப்பந்தம் இருக்கிறது. நாடுகளுக்கிடையே எல்லைப் பிரச்சனைகளை தீர்த்து வைப்பதும் – மாநிலங்களுக்கிடையே நதி நீர்ப் பிரச்னைகளைத் தீர்த்து வைப்பதும் ஒப்பந்தம்தான். தேர்தல் காலங்களில் அரசியல் கட்சிகள் கூட்டணி அமைப்பதும் ஒப்பந்தத்தின் அடிப்படையில்தான்.

இந்திய சட்டம் மற்றும் நீதித்துறையில் இந்தியன் காண்ட்ராக்ட் ஆக்ட்  ( Indian Contract Act-  1872 )  என்ற ஒரு சட்டமே இருக்கிறது. இது ஒப்பந்தங்களை ஒழுங்குபடுத்தும் சட்டமாகும்.

“All agreements are contracts if they are made by the free consent of parties competent to contract for a LAWFUL CONSIDERATION AND WITH A LAWFUL OBJECT, and or not hereby expressly declared to be VOID. “ Chapter II /10 What agreements are Contracts. 
என்று ஒப்பந்தங்களை அந்த சட்டம் வரையறை செய்கிறது. இதில் நாம் முக்கியமாக கவனிக்க வேண்டிய வார்த்தைகள் யாவை என்றால்  LAWFUL CONSIDERATION AND WITH A LAWFUL OBJECT ஆகியவையாகும் . ஒரு சட்டப்படியான பயனுக்காகவும் சட்டபடியான  நோக்கத்துக்காகவும் போடப்படுவதே ஒப்பந்தம் என்கிற வகையில் வரும் என்று அந்த சட்டம் சொல்கிறது.

ஒரு உருப்படியான காரியத்துக்கு ஒப்பந்தம் போடுங்கள், ஒருவருக்கொருவரை இழிவு படுத்திக்கொள்ளவும், உன்னைவிட நான்தான் பெரியவன் என்று அடித்துக் கொள்ளவும் – நான் சொல்வதுதான் சரி என்பதை அரங்கேற்றவும் இருசாரார் இடையே போடப்படும் ஒப்பந்தம் எல்லாம் ஒப்பந்தமே ஆகாது; அவை ஆரம்ப நிலையிலேயே ஒதுக்கித்தள்ளபட வேண்டிய ஒப்பந்தங்கள் என்பதும் நாம் விளங்கிக் கொள்ள வேண்டியவையாகும் .

நாம் எதைப் பற்றிப் பேசப் போகிறோம் என்பதை இதுவரை இதைப் படிக்கும் நண்பர்கள் விளங்கி இருப்பார்கள். இருந்தாலும் சொல்லிவிடுவோம்.
அதிரை தாருத் தவ்ஹீத் என்கிற அமைப்பும் தமிழ்நாடு தவ்ஹீத் ஜமாத் அமைப்பின் அதிரைக் கிளையும் சேர்ந்து ஒரு ஒப்பந்தம் போட்டு இருக்கிறார்கள். அதன்படி இந்த இரு அமைப்பினரும் வரும் அக்டோபர் மாதம் 27 ஆம் தேதி முதல் 30 ஆம் தேதி வரை கொள்கையற்றவர்கள் யார் ? என்ற தலைப்பில் விவாதிக்க இருக்கிறார்கள். அதிரை சேதுரோட்டில் உள்ள பவித்ரா திருமண மண்டபத்தின் அரங்கில் இந்த விவாதம் நடைபெற இருக்கிறது. இது ஒரு கருத்தரங்கம் அல்ல. விவாத அரங்கு. ஒருவர் கருத்தை மற்றவர்கள் மறுக்கும் காரணங்களை சொல்லி அடுத்தவரைப் புரியவைக்க இந்த விவாத அரங்கை ஏற்பாடு செய்து இருக்கிறார்கள் என்றே நாம் நினைக்கிறோம். அடிப்படையில் இஸ்லாம் மார்க்கம் தொடர்பாக சிலருக்கு ஏற்பட்டிருக்கும் கருத்து முரண்பாடுகளை இவர்களுக்குள் விவாதித்து ஒரு தரப்பை மறு தரப்பினர் ஏற்றுக் கொள்ள வைக்க முயற்சிப்பார்கள் என்பதே நமது புரிந்துணர்வு.

நமது ஆரம்பக் கேள்வி இப்படி ஒரு விவாதம் தேவைதானா ? என்பதே. இதனால் சமுதாயத்துக்கு என்ன பயன் ஏற்பட்டுவிடப் போகிறது என்று தெரியவில்லை. இந்த விவாத அரங்கை ஏற்பாடு செய்தவர்கள் யாராக இருந்தாலும் அடிப்படையில் ஒருவர் கொண்டுள்ள கருத்தை அடுத்தவர் மீது திணிக்கவே முயலுவார்கள் என்பதும் இதனால் ஏற்கனவே சீர்கெட்டுப் போயிருக்கிற இரு தரப்பு உறவுகள் மேலும் சீர்கெடும் என்பதும்தான் நாம் உடனடி விளைவாகக் காண்பதாகும்.

நாட்டிலும் சமுதாயத்திலும் எவ்வளவோ சமூக பொருளாதார பிரச்னைகள் தீர்க்கப்பட வேண்டி இருக்கின்றன. அதிரையைப் பொறுத்தவரை பல நோயாளிகள் தரமான சிகிச்சை பெற வழியின்றி தவித்துக் கிடக்கிறார்கள்; ஊரெங்கும் சுற்றுச் சூழல் கெட்டுப் போய் குப்பையும் கூளமுமாகக் கிடக்கிறது; பிளாஸ்டிக் கழிவுகள் நமது விவசாயத்தை முடக்கிப் போட்டு இருக்கிறது; நமது ஊரின் தெருக்களில் உள்ள குளங்களில் தண்ணீர் இல்லை; கடைமடைப் பகுதியான நமது ஊருக்கு காவிரி நீர் சரிவர வந்து சேரவில்லை; ஊரில் எல்லாத் தெருக்களிலும் மின்கம்பங்கள் தலையில் சாய்ந்து விழும் அபாயத்தில் நிற்கின்றன; நமது பள்ளிக் கூடங்களில் அரசுத்தேர்வுகளில் சரியான சதவீதத்தில் மாணவர்களின் தேர்ச்சிகள் இல்லை; சாக்கடை நீர் தெருவெங்கும் வழிந்து ஓடுகிறது; நமது மக்கள் வட்டிக்குப் பணம் வாங்கி சீரழிகிறார்கள்; வங்கிகளில் மட்டும் நமது  பெண்களின் நகைகள் கோடிக் கணக்கான ரூபாய்க்கு அடமானம் வைக்கப்பட்டு இருப்பதாக சொல்கிறார்கள்; ஊரில் சரியான மருத்துவ வசதி இல்லை; ஊரில் ஒரு இரவு நேர மருத்துவ மனை இல்லை; அரசு மருத்துவமனையில் போதிய அளவு மருத்துவர்கள் இல்லை; ஊரின் அனைத்து எல்லைகளிலும் சாராயக்கடைகள் சக்கைபோடு போடுகின்றன; வயதானவர்களுக்கு முதியோர் பென்சன் வருவது இல்லை; படிக்கும் சிறுபான்மை இன மாணவர்களுக்கு அரசு உதவித்தொகை கிடைப்பதில்லை;  ஊரின் நிலத்தடி நீர்வளம் வற்றிப் போய் வறண்டு கிடக்கிறது; முறையான போக்குவரத்து வசதிகளில் வளர்ச்சி காணப்படவில்லை; ஓடிக்கொண்டிருந்த கம்பன் ரயில் நிறுத்தப்பட்டு அதிரையைத்தவிர அனைத்து ஊர்களிலும் அகல ரயில் பாதை போடப்படுகிறது; நமக்காக கேட்க நாதி இல்லை.

இவ்வளவு தலையாய பிரச்னைகள் இருக்க, இருக்கும் இயக்கங்கள் ஊரின் நன்மைக்காக ஒன்று சேர்ந்து உருப்படியாக எதுவும் செய்யாமல் பிற மதத்தினரின் கேலிக்கு ஆளாகும் வகையில் இப்படி ஒரு தேவையற்ற விவாதமும் அதற்காக ஒரு ஒப்பந்தமும் செய்திருப்பது கேலிக் கூத்தாக இருக்கிறது என்பதை வேதனையுடன் குறிப்பிட விரும்புகிறோம்.
இவர்கள் விவாதிப்பதற்காக தேர்வு செய்திருக்கும் ஊரின் பகுதியையும் இடத்தையும் பாருங்கள். நாம் கற்பனையாக ஒன்றை நினைக்கிறோம். அரங்கின் உள்ளே விவாதம் நடந்து கொண்டிருக்கிறது என்று வைத்துக் கொள்வோம். வெளியே இரண்டு பிற மத சகோதரர்கள் இப்படித்தான் பேசிக் கொள்வார்கள்.

ஒருவர்: என்னய்யா மண்டபத்தில் என்ன விசேஷம் ?
மற்றவர்: முஸ்லீம் சமுதாயத்துக்குள்ளே  ஒருத்தரை ஒருத்தர் வார்த்தையாலே அடிச்சுக்கிரானுக !
முதலாமவர்: அப்படியா ! அடிச்சுக்கிட்டுத் தொலையட்டும்.

என்றுதானே பேசிக் கொள்வார்கள் ?  இது யாருக்குக் கேவலம் ? இதுவரை இந்த சமுதாயத்தை ஒருவரைத்தாக்கி ஒருவர் போஸ்டர்கள் ஒட்டிக் கொண்டது போதாதா ? போலீஸ் நிலையங்களில்  ஒருவர் மீது ஒருவர் புகார்கள் கொடுத்துக் கொண்டது போதாதா ? நம்மில் ஒருவரை நாமே காட்டிக் கொடுத்தது போதாதா ?  இப்போது விவாத அரங்கு என்பது என்ன புதிய பரிணாம வளர்ச்சியா ? இதனால் என்ன பயன் ஏற்படப் போகிறது ?

ஒரு தரப்பு சொல்வதை அதில் எவ்வளவு நியாயம் இருந்தாலும் அவரவருக்குள் இருக்கும் ஈகோ என்கிற அகந்தை அடுத்தவரின் விவாதத்தில் இருக்கும் நியாயத்தை ஏற்று சரண் அடைந்துவிடுமா ? அதன் பிறகும் கூட அவர்களுக்குள் அறிக்கைப் போர் அறவே அற்றுப் போய்விடுமா ? இருதரப்பு இணைய தளங்களிலும் பதில் சொல்ல முடியாமல் ஓட்டமெடுத்தார் என்று விவாதத்தில் பங்கேற்றவரின் பெயரைப் போட்டு கேவலப்படுத்துவதைத்தவிர வேறு என்ன நடக்கப் போகிறது ?

எந்தப்பயனுமில்லாமல் இருக்கும் பகையை இன்னும் அதிகபடுத்திக் கொள்ளும் இந்த விவாத அரங்கை நடத்தாமல் அதற்கான ஏற்பாடுகளை இருதரப்பும் நிறுத்திக் கொள்வது என்று இன்னொரு ஒப்பந்தம் போட்டு முடித்துக் கொண்டால் நடுநிலையாளர்கள் பலர் மகிழ்வார்கள்.
ஒன்று படாவிட்டாலும் பரவாயில்லை; தொடர்ந்து வேறுபடாதீர்கள் என்று நல்ல எண்ணத்தோடு கேட்டுக் கொள்கிறோம். பல அன்பர்களின் மனக்குமுறலே இங்கு வார்த்தைகளாக வடிக்கப்பட்டிருக்கிறது.

இரு தரப்பிலும் உள்ள மார்க்கம் கற்ற மேதைகள் இந்தக் கட்டுரையின் அடிப்படை நோக்கத்தையும் நியாயத்தையும் தயவுசெய்து  களங்கப் படுத்தாமல் – காரணம் கற்பிக்காமல்  குறிப்பிட்ட நிகழ்வை மனம் ஒத்து இரத்து செய்தால் அந்தச் செயல் ஊரார் பலருக்கு மகிழ்வைத்தரும்.