பெட்ரோமாக்ஸ் விளக்கை காட்டி நூதன மோசடி ! ஏமாற்றிய கும்பல் கைது !!

பேராவூரணி அருகே இரிடியம் இருப்பதாக பெட்ரோமாக்ஸ் விளக்கை காட்டி ஏமாற்றி மோசடி செய்ய முயன்ற கும்பலை திருச்சிற்றம்பலம் காவல்துறையினர் சுற்றி வளைத்து கைது செய்துள்ளனர்.
           
பழங்கால கோவில்களில் தாமிர கலசங்களில் இரிடியம் என்னும் விலை மதிப்பு மிக்க உலோகங்கள் கலந்து தயாரிக்கப்பட்டது. இது கோவில் கோபுரங்களை இடி தாக்காமல் காக்க பயன்பட்டுள்ளன. இரிடியம் சர்வதேச சந்தையில் கிலோ 50 லட்சத்திற்கும் அதிகமான மதிப்பு உடையது. நூற்றாண்டு பழமை வாய்ந்த பெட்ரோமாக்ஸ் விளக்குகளில் இரிடியம் இருப்பதாக நம்பப்படுகிறது.
           
இந்நிலையில் பேராவூரணியை அடுத்த ஆவணம் என்ற இடத்தில் பெட்ரோமாக்ஸ் விளக்குகளை காட்டி, நூறாண்டு பழமை வாய்ந்த பெட்ரோமாக்ஸ் விளக்கில்  இரிடியம் இருப்பதாகவும், இதை வீட்டில் வைத்தால் செல்வம் பெருகும், நோய், நொடிகள் நெருங்காது. அதிர்ஷ்டம் தேடிவரும் என்று சொல்லி இரிடியம் உள்ள அபூர்வ விளக்கின் விலை 5 லட்சம் என்று கூறி, மோசடி கும்பல் ஏமாற்ற முயன்றதாம்.
               
அதே சமயத்தில் வாகனசோதனையில் ஈடுபட்டிருந்த திருச்சிற்றம்பலம் காவல்துறை ஆய்வாளர் பழனிசாமி, உதவி ஆய்வாளர் சின்னப்பா, காவலர்கள் ஆதிமூலம், மதிவாணன், பத்மநாதன், கணேசன் உள்ளிட்ட குழுவினர் மோசடி கும்பலை சுற்றி வளைத்து கைது செய்தனர்.
             
கும்பலில் சிவகங்கை, திருமயம், மணமேல்குடி, பட்டுக்கோட்டை பகுதியை சேர்ந்த கிருபாகரன்( வயது 27), ஷாஜகான்(37), மணிகண்டன்(28), இளங்கோவன்( 32), மகாலிங்கம்(53), பக்ருத்தீன்(37), ரெங்கசாமி(60), ராமையன்( 52), முருகேசன்(65), மணிமாறன்( 32) உள்ளிட்ட பத்து பேரையும் கைதுசெய்து, அவர்கள் வந்த வாகனத்தையும், பெட்ரோமாக்ஸ் விளக்கையும் பறிமுதல் செய்த காவல்துறையினர் வழக்கு பதிவு செய்து விசாரணை நடத்தி வருகின்றனர்.

செய்தி மற்றும் படம்:
எஸ்.ஜகுபர் அலி, பேராவூரணி