இமாம் ஷாஃபி மெட்ரிக். பள்ளி மாணவர்களின் நேர்மைக்கு குவியும் பாராட்டு!

இமாம் ஷாஃபி மெட்ரிக். பள்ளி மாணவர்கள் அப்சர் ரிஜ்வான், சுபைத்

அதிராம்பட்டினம், ஜூலை 25
அதிராம்பட்டினத்தில் உள்ள இந்திய வங்கி ஏடிஎம் மிஷினில் இருந்த ரூ. 45 ஆயிரத்தை காவல்துறையினரிடம் ஒப்படைத்த மாணவர்களை போலீசார் உட்பட அனைவரும் பாராட்டினர்.

தஞ்சை மாவட்டம், அதிராம்பட்டினம் பழஞ்செட்டித்தெருவை சேர்ந்தவர் அப்துல் மாலிக். இவரது மகன் அப்சர் ரிஜ்வான். இமாம் ஷாஃபி மெட்ரிக். மேல்நிலைப்பள்ளியில் 11 ஆம் வகுப்பு படித்து வருகிறார். அதே பள்ளியில் 12 ஆம் வகுப்பு படித்துவரும் இவரது நண்பர் சுபைத் உடன் இந்தியன் வங்கி ஏடிஎம் மிஷினில் பணம் செலுத்துவதற்காக நேற்று முன்தினம் இரவு 8 மணிக்கு அப்சர் முயன்றார். அந்த ஏடிஎம் இயந்திரத்தில் பணம் வைக்கும் இடத்தில் ரூ.45 ஆயிரம் இருந்தது. இதையடுத்து, அந்த பணத்தை எடுத்துக்கொண்டு அதிராம்பட்டினம் காவல் நிலையம் சென்று ஏட்டு பாலசுப்பிரமணியத்திடம் ஒப்படைத்தனர்.

இதையடுத்து, இந்தியன் வங்கி மேலாளர் ராஜசேகரிடம் இதுகுறித்து நடத்திய விசாரணையில், அதிராம்பட்டினம் செட்டித்தோப்பு பகுதியை சேர்ந்த இளங்கோ என்பவர் கடந்த ஜூலை 23 ந் தேதி இந்தியன் வங்கி ஏடிஎம் மிஷினில் ரூ.45 ஆயிரம் பணத்தை டெபாசிட் செய்ததாவும், ஆனால் இதுவரையில் தனது வங்கி கணக்கில் பணம் வரவு வைக்க வில்லை என தெரிவித்தார். இதன் பின்னர், நடத்திய விசாரணையில் இளங்கோ தான் பணத்தை டெபாசிட் செய்ய முயன்றது தெரியவந்தது. இதையடுத்து, வங்கி மேலாளர் ராஜசேகர் பணத்தை இளங்கோவிடம் ஒப்படைத்தார்.

மேலும், பணத்தை பத்திரமாக காவல்துறையிடம் ஒப்படைத்த இமாம் ஷாஃபி மெட்ரிக். மேல்நிலைப்பள்ளி மாணவர்கள் அப்சர் ரிஜ்வான், சுபைத் ஆகியோரின் நேர்மையை, வங்கி மேலாளர் ராஜசேகர், அதிராம்பட்டினம் காவல்நிலைய ஆய்வாளர் தியாகராஜன், இமாம் ஷாஃபி மெட்ரிக் மேல்நிலைப்பள்ளி நிர்வாகம், ஆசிரியர்கள் மற்றும் இப்பகுதியை சேர்ந்த பொதுமக்கள் பலர் பாராட்டி வாழ்த்து தெரிவித்து வருகின்றனர்.