காதிர் முகைதீன் ஆண்கள் மேல்நிலைப்பள்ளி மற்றும் 'அதிரை நிருபர்' வலைத்தளம் இணைந்து நடத்திய ஆசிரியர் தின விழா !

இன்று [ 05-09-2013 ] மாலை 4.30 மணியளவில் அதிரை காதிர் முகைதீன் ஆண்கள் மேல் நிலைப்பள்ளி மற்றும் 'அதிரை நிருபர்' வலைத்தளம் இணைந்து நடத்திய ஆசிரியர் தினம் மற்றும் இலக்கிய மன்ற தொடக்க விழா நிகழ்ச்சி பள்ளியின் வளாகத்தில் சிறப்பாக நடைபெற்றது.

விழாவிற்கு காதிர் முகைதீன் ஆண்கள் மேல்நிலைப்பள்ளியின் தலைமை ஆசிரியர் மகபூப் அலி தலைமை வகித்து விழாவை சிறப்பாக வழி நடத்தி சென்றார். இதில் சிறப்பு விருந்தினராக கலந்துகொண்ட சித்தாதிகாடு ஊராட்சி ஒன்றிய தொடக்கப்பள்ளியின் தலைமை ஆசிரியர் திரு. கோவி. தாமரைச்செல்வன் சிந்தனையைத் தூண்டும் நகைச்சுவை உரையாற்றி அனைவரையும் அசத்தினார்.

அதிரையின் பிரபல எழுத்தாளர் இப்ராஹீம் அன்சாரி அவர்கள் தனது வாழ்த்துரையில் பள்ளியில் புதிதாக அரங்கு ஒன்றை ஏற்படுத்தவும், அடுத்த ஆண்டின் ஆசிரியர் தின விழாவை அந்த அரங்கில் சிறப்பாக நடத்த வேண்டும் என்ற ஆவலை வெளிப்படுத்தினார். இந்த பணிக்காக கல்வியாளர்களை  தான் இணைத்துக்கொண்டு முழு வீச்சில் ஈடுபடப்போவதாகவும் கூறினார். இதை தொடர்ந்து வாழ்த்துரை வழங்க வந்த கல்வியாளர் 'நாவலர்' நூர் முஹம்மது அவர்கள் 'கல்வி தினம்' குறித்தும் அதனை ஆண்டுதோறும் கொண்டாடப்படுவதின் அவசியம் குறித்தும் அழகாக விளக்கினார். தனது பேச்சில் மாணவர்கள் தினமும் புத்தகம் படிப்பது அவசியம் என்பதையும் கூறினார்.

பள்ளியின் வளாகத்தில் புதிதாக போர்வெல் அமைத்திட அதிரையின் பிரபல தொழில் அதிபர் எவர் கோல்டு செல்வம் அவர்கள் வழங்கிய ரூபாய் 1 லட்சத்திற்கான காசோலையை அதிரை பேரூராட்சி தலைவர் அஸ்லம், திமுக நகர செயலாளர் இராம்.குணசேகரன், அதிரை நகர காங்கிரஸ் தலைவர் MMS அப்துல் கரீம் ஆகியோர் இணைந்து பள்ளியின் தலைமை ஆசிரியர் மகபூப் அலி அவர்களிடம் ஒப்படைத்தனர்.

பள்ளியின் சார்பில் விளையாட்டு போட்டிகளில் கலந்து கொண்டு சாதனை நிகழ்த்திய மாணவர்கள் அனைவரும் மேடைக்கு அழைத்து பரிசுகள் வழங்கி கெளரவிக்கப்பட்டார்கள். பள்ளியில் பணி புரிந்து ஓய்வு பெற்ற முன்னாள் ஆசிரிய பெருமக்கள் SKM ஹாஜா முகைதீன், முஹம்மது அலியார், முஹம்மது ஹனிபா, வாவன்னா சார், சண்முகம், சீனி வாசன், ராமசந்திரன் ரோசம்மாள், ஹாஜி முஹம்மது ஆகியோருக்கு எழுத்தாளர் இப்ராஹீம் அன்சாரி அவர்களால் பொன்னாடை போர்த்தி கெளரவிக்கப்பட்டது.

இதையடுத்து அதிரை நிருபர் வலைத்தளம் சார்பில் பிரத்தியோகமாக தயாரிக்கப்பட்ட சிறப்பு பரிசை பள்ளியில் பணி புரியும் அனைத்து ஆசிரியப் பெருமக்களுக்கும் வழங்கி கெளரவிக்கப்பட்டது. பரிசை கர்ழன் ஹஸனா அழகிய கடன் அறக்கட்டளையின் ஆலோசகரான A.S. அப்துல் காதர் வழங்கினார்.

முன்னதாக வந்திருந்த அனைவரையும் காதிர் முகைதீன் ஆண்கள் மேல் நிலைப்பள்ளியின் முதுகலை தமிழ் ஆசிரியர் அஜ்முதீன் வரவேற்று பேசினார். நிகழ்ச்சிகள் அனைத்தையும் பள்ளியின் தமிழ் ஆசிரியர் உமர் பாருக் இனிய தமிழில் அழகாக தொகுத்து வழங்கி இறுதியில் நன்றியுரையை வழங்கினார்.

இந்நிகழ்ச்சியில் பெற்றோர் ஆசிரியர் கழக பொறுப்பாளர்கள், அரசியல் பிரமுகர்கள், ஊர் பிரமுகர்கள், கல்வியாளர்கள், சமூக ஆர்வலர்கள், ஓய்வு பெற்ற ஆசிரியப் பெருமக்கள், பள்ளியின் ஆசிரிய ஆசிரியைகள்  - அலுவலக பணியாளர்கள் - மாணவர்கள் - பெற்றோர்கள் என அனைவரும் கலந்துகொண்டு சிறப்பித்தனர். வந்திருந்த அனைவரையும் பள்ளியின் ஆசிரிய ஆசிரியைப் பெருமக்கள் அன்புடன் வரவேற்று மகிழ்ந்தனர்.

செய்தி மற்றும் படங்கள் :
நூர் முஹம்மது ( நூவன்னா )