உச்சகட்ட பணியில் செக்கடி குளம் ! [ படங்கள் இணைப்பு ]

அதிரையின் பொக்கிஷங்களில் ஒன்றாக திகழும் செக்கடி பள்ளிவாசலோடு இணைந்து காணப்படும் செக்கடி குளத்தை நவீன படுத்தும் முயற்சியில் அப்பகுதியை சேர்ந்த பிரமுகர்கள் ஈடுபட்டு வருகின்றனர். இதற்காக கடந்த சில வாரங்களாக ஜேசிபி இயந்திரத்தின் உதவியோடு குளத்தை சுற்றி காணப்படும் மேடுகளை அகலப்படுத்தி பாதுகாப்பான முறையில் நடை மேடை அமைக்கவும், நடைமேடையில் புற்களை அமைத்து நவீனப்படுத்தவும், மேலும் நடை மேடையின் இருபுறமும் செடிகள், மரங்கள் அமைக்கவும் ஏற்பாடு செய்யப்பட்டு வருகிறது.

குளத்தின் வடமேற்கு பகுதியில் காணப்படும் நடைமேடையிலிருந்து மணல் சரிந்து வாய்க்காலில் அடைப்பு ஏற்படாமல் தடுப்பதற்காக செக்கடி குளத்திற்கு தண்ணீர் வரும் வாய்க்காலை விரிவாக்கம் செய்யும் பணி தற்போது நடைபெற்று வருகிறது. இதற்காக 3 அடி அகலமுள்ள சிமென்ட் குழாய்கள் வரவழைக்கப்பட்டு அதில் பொருத்தப்பட இருக்கிறது.

உச்சகட்டமாக நடைபெற்று வரும் பணியியினால் குளத்தின் தோற்றம் புதுப்பொலிவுடன் காட்சியளிப்பதோடு மட்டுமல்லாமல் பொதுமக்கள் பாதுகாப்பான நடை பயிற்சியை மேற்கொள்ள முடியும் என்பது அப்பகுதியினரின் கருத்தாக இருக்கிறது. மேலும் குளம் புனரமைப்பு பணி தொடர்பாக சிறந்த ஆலோசனைகளையும் ஒத்துழைப்பையும் நம்மிடம் எதிர்பார்ப்பதாக ஏற்பாட்டாளர்கள் கூறுகின்றனர்.