வேட்டிய மடிச்சி கட்டிகிட்டு களத்தில் நிற்கும் அதிரை கவுன்சிலர்கள் !

அதிரை நடுத்தெரு கீழ்புறம், வாய்க்கால் தெரு, புதுத்தெரு ஆஸ்பத்திரி தெரு உள்ளிட்ட பகுதிகளில் வசிக்கும் பொதுமக்கள் தக்வா பள்ளி வளாகத்தில் அமைந்துள்ள 1 ம் நம்பர் ரேஷன் கடையில் பொருட்களை வாங்கி வருகின்றனர். அதே போல் பள்ளி மாணவிகளும் இந்த சந்தின் வழியாக பள்ளிக்கூடங்களுக்கு சென்று வருகின்றனர். மக்கள் நடமாட்டத்துடன் எந்நேரமும் பரபரப்பாக காணப்படும் இந்த சந்து பகுதியில் அதிகளவில் குப்பை கழிவுகள் குமிந்து வந்தது. மேலும் இந்த பகுதியின் குடியிருப்பிலிருந்து வெளியேறும் கழிவு நீர் தாழ்வான பகுதியில் தேங்கி துர் நாற்றமும் வீசி வந்தது. இதனால் இப்பகுதியில் செல்லும் பள்ளி மாணவிகள், பொதுமக்கள் மிகுந்த சிரமத்திற்குள்ளாகி வந்தனர்.

இதுதொடர்பாக பல்வேறு தரப்பினர் சம்பந்தபட்டோரிடம் தொடர் கோரிக்கை வைத்து வந்தனர். இந்நிலையில் இன்று காலை இந்த சந்தில் குமிந்து காணப்படும் குப்பைகளையும், வீடுகளிலிருந்து வெளியேறி தேங்கி நின்ற கழிவு நீரையும் பேரூராட்சி துப்புரவு பணியாளர்களை கொண்டு தூய்மை படுத்தும் பணியை இந்த பகுதிகளின் கவுன்சிலர்கள் அப்துல் காதர், நூர்லாட்ஜ் செய்யது ஆகியோர் ஈடுபட்டனர். இந்த பணிகள் அனைத்தும் முடியும் வரை உடன் இருந்து மேற்பார்வையிட்டனர். வேட்டியை மடிச்சி கட்டிக்கிட்டு துப்புரவு பணியாளர்களிடம் களத்தில் நின்று வேலை வாங்கியது இப்பகுதியில் சென்றோரை வியப்பில் ஆழ்த்தியது. இதுபோல் அதிரையின் பிற பகுதிகளின் கவுன்சிலர்களும் அந்தந்த பகுதிகளில் ஏற்படும் குறைகளை களத்தில் நின்று சரிசெய்ய வேண்டும் என ஆர்வலர்கள் குறிப்பிட்டனர்.