நள்ளிரவில் வாகனம் மோதியதில் சிஎம்பி லேன் பகுதி மின்கம்பம் முறிந்து கீழே சாய்ந்தது ! பெரும் விபத்து தவிர்ப்பு !

அதிரை பேரூராட்சிக்கு உட்பட்ட 21 வது வார்டு சிஎம்பி லேன் பகுதியின் ஹனீப் பள்ளி எதிரே உள்ள பாதையில் அமைந்துள்ள அமானத் ஸ்டோர் ஷாலிஹ் அவர்களின் வீடு அருகே நள்ளிரவு சுமார் 1 மணியளவில் திடீரென பலமான சப்தம் கேட்டது. தூங்கிகொண்டிருந்த அப்பகுதியினர் சம்பவ இடத்தை பார்வையிட்ட போது, அங்கு மின் கம்பம் முறிந்து சாலையின் குறுக்கே சாய்ந்து கிடந்தது. உடனே அதிரை மின்சார வாரிய அலுவலகத்திற்கும், இப்பகுதியின் வார்டு உறுப்பினர் முஹம்மது இப்ராஹீம் ஆகியோருக்கு தகவல் கொடுத்தனர். சம்பவ இடத்திற்கு விரைந்து வந்த இவர்கள் இப்பகுதிக்கு செல்லும் மின்இணைப்பை துண்டிப்பு செய்தனர். சரியான நேரத்தில் துரித நடவடிக்கை மேற்கொள்ளப்பட்டதால் இப்பகுதியில் நிகழ இருந்து பெரும் விபத்து தவிர்க்கப்பட்டது.

நள்ளிரவில் இப்பகுதியின் வழியே வந்த அடையாளம் தெரியாத வாகனம் மின்கம்பத்தில் பலமாக மோதியதே விபத்திற்கான காரணம் என கூறப்படுகிறது. மேலும் மின்கம்பம் சாய்ந்த இடத்தில் வாகனத்தின் பின்புறமுள்ள இன்டிகேட்டார் விளக்கின் உடைந்த துகள்கள் கண்டறியப்பட்டுள்ளதாக கூறப்படுகிறது. நள்ளிரவில் நிகழ்ந்த இந்த சம்பவத்தால் இப்பகுதி பெரும் பரபரப்பாக காணப்பட்டது.