பழுதடைந்த வாகனங்களால் அதிரையில் குப்பைகள் அள்ளுவதில் சிரமம் - ஊழியர்கள் அவதி !! குப்பைகள் குமியும் அபாயம் !!!

அதிரை பேரூராட்சிக்கு சொந்தமான 2 டிராக்டர்களும், 1 அபேய் வாகனமும் உள்ளது. இவற்றை கொண்டு அதிரை பகுதிகளில் தினமும் குமியும் குப்பைகளை அள்ளிச்சென்று ஊருக்கு அப்பால் கொட்டப்படுகிறது. இதில் அபேய் வாகனத்தில் ஏற்பட்ட திடீர் பழுதால் பழுதை சரிசெய்வதற்காக தற்போது வொர்க்ஸ்சாப்பில் சில நாட்களாக கிடக்கிறது. 

மீதமுள்ள 2 வாகனங்களை கொண்டு குப்பைகள் அள்ளப்பட்டு வந்தது. பரந்துவிரிந்த பகுதியான அதிரைக்கு இந்த வாகனங்கள் போதாது என்றும், வாகனங்களின் எண்ணிக்கையை அதிகப்படுத்த வேண்டும் என்றும் சமூக ஆர்வலர்கள் கூறி வந்தாலும், இருக்கிற வாகனங்களை கொண்டு நகரில் குமியும் குப்பைகளை ஊழியர்கள் தினமும் அள்ளி வந்தனர். மேலும் பணி நேரங்களை பிரித்து கொண்டு இரவு நேரங்களிலும் பணி செய்து வந்தனர்.

இந்நிலையில் இன்று காலை வண்டிப்பேட்டை அருகே பேரூராட்சியின் மற்றொரு வாகனத்தில் ஏற்பட்ட திடீர் பழுதால் சாலையோரத்தில் நிறுத்தப்பட்டுள்ளது. பழுதடைந்த வாகனத்தின் டயர்கள், இணைப்பு பெட்டி உள்ளிட்ட முக்கிய பகுதிகள் மிகவும் மோசமான நிலையில் காணப்படுகிறது. இவற்றை ஊழியர்கள் கையாள்வதில் சிரமம் ஏற்படுவதை அறியமுடிகிறது.

தற்போது 2 வாகனங்களும் பழுதடைந்து காணப்படுவதால் மீதமுள்ள ஒரு வாகனத்தை கொண்டு குப்பைகள் அள்ளுவதில் சிரமம் ஏற்படும் சூழல் உருவாகி உள்ளது. ஏற்கனவே தெருக்களில் ஆங்காங்கே குப்பை கூளங்கள் குமிந்து காணப்பட்டு வந்ததால், சுகாதார சீர்கேடு ஏற்பட வாய்ப்பு உள்ளதாக கருதி பொதுமக்களிடமிருந்து புகார்கள் சென்றது. இதையடுத்து அதிரடியாக களத்தில் இறங்கிய அதிரை பேரூராட்சி நிர்வாகம் ஊழியர்களின் உதவியோடு ஆங்காங்கே குமிந்து காணப்படும் குப்பை கூளங்களை அப்புறப்படுத்தி வந்தது.

இந்நிலையில் மீண்டும் வாகன பழுதால் நகரில் குப்பைகள் தேங்கும் அபாயம் ஏற்பட்டு உள்ளது. அதிரை பேரூராட்சி நிர்வாகம் துரித நடவடிக்கையாக குப்பைகளை அள்ளுவதற்காக புதிதாக வாகனங்களை கொள்முதல் செய்து பயன்படுத்த வேண்டும் என்பது பெரும்பாலான மக்களின் கோரிக்கையாக இருக்கிறது. மேலும் பொதுமக்களின் உயிருக்கு உலை வைக்கும் இது போன்ற பழைய வாகனங்களை அதிரை பகுதிகளில் பயன்படுத்துவதை தவிர்க்க வேண்டும் என்பதும் முக்கிய வேண்டுகோளாக இருக்கிறது.