தொடர் சாதனையில் காதிர் முகைதீன் ஆண்கள் மேல்நிலைப்பள்ளி !

பட்டுக்கோட்டை, பேராவூரணி, ஒரத்தநாடு குறு வட்டங்களுக்கு இடையிலான கால்பந்தாட்ட போட்டி அதிரை காதிர் முகைதீன் கல்லூரி மைதானத்தில் இன்று துவங்கியது. இதில் பல்வேறு பள்ளிகளை சேர்ந்த கால்பந்தாட்ட வீரர்கள் பங்கேற்று விளையாடினர்.

இதில் காதிர் முகைதீன் ஆண்கள் மேல்நிலைப்பள்ளியின் சார்பில் 6 முதல் 8 ம் வகுப்பு வரையிலான மாணவர்கள் பங்கேற்ற ஜூனியர் பிரிவிலும், 9 முதல் 10 ம்  வகுப்பு வரையிலான மாணவர்கள் பங்கேற்ற சீனியர் பிரிவிலும், 11 முதல் 12 ம் வகுப்பு வரையிலான மாணவர்கள் பங்கேற்ற சூப்பர் சீனியர் பிரிவிலும் ஆடியது. விறுவிறுப்பாக நடைபெற்ற ஆட்ட இறுதியில் காதிர் முகைதீன் ஆண்கள் மேல்நிலைப்பள்ளி அனைத்து பிரிவிலும் சாம்பியன் பட்டத்தை வென்றது. பள்ளி வரலாற்றில் பல ஆண்டுகளுக்கு பிறகு சாம்பியன் பட்டத்தை வென்று சாதனை நிகழ்த்தியுள்ளது குறிப்பிடத்தக்கது. 

இதையடுத்து பரிசளிப்பு நிகழ்ச்சி நடைபெற்றது. இதில் காதிர் முகைதீன் ஆண்கள் மேல்நிலைப்பள்ளியின் தலைமை ஆசிரியர் மஹபூப் அலி தலைமை வகித்தார். இதில் சிறப்பு விருந்தினர்களாக கலந்து கொண்ட பள்ளியின் முன்னாள் சாதனையாளரும், 1952 ம் ஆண்டில் மதராஸ் மஹான மாநில போட்டியில் 100 மீட்டர் ஓட்டப்பந்தயத்தில் பங்கேற்று வெற்றி வாகை சூடியவருமாகிய ஹாஜி அபுல் கலாம், கல்வியாளர் 'நாவலர்' நூர் முஹம்மது, பெற்றோர் ஆசிரியர் கழக துணை தலைவர் முஹம்மது தமீம், பள்ளிகளின் உடற்கல்வி ஆசிரியர்கள் ஆகியோர் கால்பந்தாட்ட வீரர்களுக்கு பரிசுகளை வழங்கி கெளரவித்தார்கள்.

சாதனை நிகழ்த்திய கால்பந்தாட்ட வீரர்களை ஊக்குவிக்கும் விதமாக அதிரை ப்ரெண்ட்ஸ் ஃபுட் பால் அசோசியேஷன் [ AFFA ] சார்பில் ரன்னர் மற்றும் வின்னர் அணிகளுக்கு பதக்கங்கள் வழங்கப்பட்டது. இந்நிகழ்ச்சியில் ஊர் பிரமுகர்கள், AFFA நிர்வாகிகள், விளையாட்டு ஆர்வலர்கள், பள்ளி மாணவர்கள் என ஏராளமானோர் கலந்துகொண்டனர். 

சமீப காலமாக பல்வேறு இடங்களில் நடைபெற்று வரும் விளையாட்டு போட்டிகளில் பள்ளியின் சார்பில் பங்கேற்று சாம்பியன் பட்டத்தை வென்று தொடர் சாதனைகளை நிகழ்த்தி வருவது குறிப்பிடத்தக்கது.

செய்தி மற்றும் படங்கள் : நூவன்னா