முன்னாள் தலைமை ஆசிரியர் SKM ஹாஜா முகைதீன் அவர்களின் ஆசிரியர் தின வாழ்த்து செய்தி !

இன்று செப்டம்பர் 5 ம் நாள். நமது நாட்டின் இரண்டாம் குடியரசு தலைவர் டாக்டர் இராதாகிருஷ்ணன் பிறந்த தினமாகிய இந்நாளில் கொண்டாடப்படும் ஆசிரியர் தினத்தன்று அனைத்து வகை ஆசிரியர் ஆசிரியை பெருமக்களுக்கும் ஆசிரியர் தின வாழ்த்துக்களை தெரிவித்துக்கொள்கிறேன்.

ஆசிரியர் தின வாழ்த்துக்களை தெரிவித்துக்கொள்ளும் அதே வேளையில் ஆசிரியர் தின செய்திகளாக என் எண்ணம் சார்ந்த சில கருத்துகளையும் பதிவு செய்திட விரும்புகிறேன்.

மாறிவரும் காலச்சூழ் நிலையில் கல்விச் சூழ்நிலையும் பெரிதும் மாறி வருகிறது. 'அகல உழுவதைக்காட்டிலும் ஆழ உழுவதே மேல்' என்ற போக்கு மாறி 'அகல உழுவதே மேல்' என்ற போக்கு கல்வித்துறையில் உருவாகியுள்ளது. தேர்வுகளில் குறிப்பாக 10 ம் வகுப்பு மற்றும் 12 ம் வகுப்பு அரசுப் பொதுத்தேர்வுகளில் நூற்றுக்கு நூறு தேர்ச்சி பெற்றுப் பெருமை தேடிக்கொள்ள விரும்பும் பள்ளிகள் பரவலாகக் காணப்படுகின்றன. பெற்றோர்களும் அத்தகைய பள்ளிகளை நாடியே ஓடுகிறார்கள். கட்டணத்தை பற்றிக்கூட கவலைபடாமல். அரசுக் கல்வித்துறையும் இத்தகைய பள்ளிகளையே போற்றி பாராட்டுகிறது. எனவேதான் இப்பள்ளியில் பணியாற்றும் ஆசிரியர்கள் தேர்வை மட்டுமே இலக்காகக் கொண்டு மாணவர்களை உருவாக்குகின்றனர். இத்தகைய மாணவர்கள் உயர்க் கல்வியிலும் ஆய்வுக் கல்வியிலும் சிறப்பிடம் பெறத் தவறி விடுவதாக சமீபத்திய ஆய்வுகள் தெரிவிக்கின்றன.    

எனவே ஆசிரியர்கள் தங்கள் மாணவர்களுக்கு கல்வியோடு தன்னம்பிக்கையை வளர்த்தல், சுயசிந்தனையை ஊக்குவித்தல், சூழ்நிலைக்கேற்ப முடிவெடுத்தல், பிரச்சனைகளை எதிர்கொள்ளுதல், தோல்வி கண்டுத் துவளாதிருத்தல், கூச்சமின்றிப் பேசுதல், நல்ல நண்பர்களைத் தேர்வு செய்தல், காலத்தின் அருமையைக் கருதுதல், மனிதம் சார்ந்த அறப்பண்புகளைப் பெற்றுத் திகழ்தல் போன்ற வாழ்வின் வெற்றிக்குத் தேவையான வழி காட்டல்களையும் கற்றுத்தர வேண்டும். அப்போதுதான் ஆசிரியப்பணி அறப்பணியாகப் போற்றுதற்குரிதாகும்.
   
S.K.M ஹாஜா முகைதீன் M.A., B.Sc., BT
தலைமை ஆசிரியர் ( ஓய்வு )